Imphal, Jymmang:
Ki bor pahara ki la pynjur ïa ki kam pyrshah ïa ki lehnoh ha kylleng ka jylla Manipur ha ka 11 bad 12 tarik u Jymmang, kaba la pynlong ban ïohkem ïa ki katto katne ngut ki dkhot nongïarap kiba treikam bad ki kynhun kiengatiar kiba la shah ñiew beaiñ bad ki la ïoh ban kurup ruh ïa shibun ki tiar siat, pynbthei bad kiwei pat ki tiar ba ju pyndonkam ha ka ban phah khubor bad ai jingtip na kylleng ki jaka kiba don ha ka jylla.
Uwei u dkhot ba treikam bha jong ka kynhun KYKL u la shahkem na Nongada Makha Leikai kaba hap hapoh ka Lamlai Police Station kaba don ha Imphal East district ha ka 12 tarik u Jymmang. Ïa une uba la shahkem la tip kyrteng kum u Toijam Sanamani Meetei (48), uba dei u nongshong shnong jong ka Nongada Awang Leikai.
Ha kawei pat ka jingkhynra ha ka 11 tarik u Jymmang, ki bor pahara ki la ïoh kurup ïa u bom Improvised Explosive Device (IED) na ka thaiñ Tronglaobi Maning Gurukhana kaba hap hapoh Moirang Police Station ha Bishnupur distrik.
Ki tiar ba la ïoh ba kurup ki kynthup ïa ki Wireless-Controlled Relay Switch bad ki Batteru, ki phngit Gunpowder ba la pyndap, ki bom pynbthei, ki wire, ki Electric wires, bad ki Safety Fuse wires.
Ka jingkhynra kaba heh bha ban kurup ïa ki tiar ïaleh ka dei kaba la pynlong ha ka 12 tarik u Jymmang na Loktak Mapal hajan ka Keipha Road kaba hap hapoh jong ka Moirang Police Station ha Bishnupur distrik.
Ki bor pahara ki la kurup ïa ka suloi Bolt-action, ka suloi 9 mm, ki bom mortar, ki bom kawang kti HE-36, ki bom pynlynguh tdem, ki Glatin stick, ki Anti-aircraft ammunition, ki ballistic cartridges, Shotgun shells, Stun grenades, ka Baofeng Radio set, bad ki Bulletproof Plates nalor kiwei pat ki tiar siat ba la buh na ka bynta ka jinghiar thma.
Ha ka jingkhynra ba kyrpang ha ka thaiñ Laisoi kaba hap hapoh ka Keibul Lamjao Police Station ha Bishnupur district, ki shipai ki la ïoh ban kurup ar tylli ki suloi bolt-action, kawei ka pistol ba la shna da ka ri, ki rocket mortar, ar tylli ki bom IED kiba khia kumba 4 kilo eiei, ki bom kawang kti, ki bom pynbthei, ki jacket BP bad ki Helmet, ki tiar ïakren bad phah khubor bad kiba bun kiwei pat ki tiar pyndonkam ba la thep ha ki borni.
Ki bor pahara ki la ïoh ban kem ruh ïa uwei u dkhot ba trei shitom jong ka KCP (PWG) ïa uba la tip kyrteng kum u Khulem Shyam Singh (23) na Langol Laimanai kaba hap hapoh jong ka Lamphel Police Station ha Imphal West distrik. Na kti jong u la kurup ar tylli ki mobile phone bad kawei ka receipt ban pynshisha halor ka Aadhaar.
Uwei pat u lehnoh uba don jingïadei bad ka NRFM u dei uba la tip kyrteng kum u Ningthoujam Thoiba Meitei ba la tip ruh da ka kyrteng kum u Ton (27) une u la shah kem na Checkon Crossing kaba hap hapoh ka jingkhmih jong ka thanat Porompat. Une u briew u dei shnong trai na Khumujamba Leikai ha Churachandpur distrik bad u la sah ha New Checkon ha Imphal East.
Ha kajuh ka por, uwei u dkhot ba treikam jong ka PREPAK uba la tip kyrteng kum u Nepram Dijamani Meetei (52) u la shah kem na ka thaiñ Canchipur Super Market kaba hap hapoh jong ka Singjamei Police Station ha Imphal West distrik. Ki bor pahara ki la ïoh kurup 11 tylli ki shithi dawa jong ka PREPAK kiba la kynnoh ba la soi da ka tnad pla tyngka jong ka kynhun ryngkat bad kawei ka mobile phone na kti jong u.
Ki bor synshar ki la ong ba ki jingtalasi bad ki jingleh ban synshar ïa ki jaka ki dang ïai bteng ha ki jaka ba marjan bad ki jaka ba rit paid ha kylleng ka Manipur kum shi bynta ban pynkhlaiñ ïa ki lad jingïada.
Ki bor pahara ki la pynkhlaiñ ruh ïa ka jingpahara ha shilynter ka surok bah National Highway-37, ha kaba la pynïaid ïa ka jingleit jingwan jong ki 156 tylli ki kali kiba kit ïa ki mar ba kongsan hapoh ka jingïada da ki tiar ïaleh ban pynthikna ïa ka jingpynbiang kaba khlem jingthut bad ka jingleit jingwan kaba shngaiñ lyngba ki jaka kiba kham ap jingma.
Nalor kata, ki pulit bad ki tnad pahara ki la buh 115 tylli ki naka bad ki jaka talasi ha kylleng ki jaka lum bad them kum shi bynta ban pynkhlaiñ ïa ka jingpeitngor bad ki lad jingïada ban khanglad ïa ki kam pyntriem jong ki riew kieng atiar.
