Shillong, Jymmang 13
Ka tnat ïalehkai jong ka Sorkar Jylla kan sa pyllait sa kumba T. 23.37 klur sha ki synjuk ïalehkai na ka bynta ban pynkhreh ïa ki kynhun ïalehkai hashwa ban sdang ka 39th National Games 2027 ka ban long ha kane ka Jylla.
Ïa kane la pynpaw da u Myntri ka tnat ïalehkai u Bah Wailadmiki Shylla ha ka jingïalang bad ki nongïalam jong ki synjuk ïalehkai bapher bapher ha ka sngi Balang ha State Convention Centre, Shillong ha kaba la ïadon lang u Joint Secretary ka tnat ïalehkai u Richard Yanthan, kumjuh u Director Dikki D. Shira, ki nongïalam ka Meghalaya State Olympic Association (MSOA) kata u Working President Bah John F Kharshiing bad u Bah Finely Lad Pariat bad ki nongïalehkai.
“Kiba bun ki synjuk ïalehkai ki la trei shitom bha da kaba ki la lah ban sei ïa ki nongïalehkai kiba la lah ban kheit ïa u soh ka jingjop ha ka Khelo India Tribal Games 2026. Watla ha u snem ba la lah ngi la don ha ka kyrdan ba 29 hynrei mynta ka kynti ngi la lah ban jam sha shaduh ka kyrdan ba 13. Kane ka pyni ïa ka jingkiew ka Jylla ha ka kam ïalehkai.”
“Kane ka pyni ba ka jingpynlut ka Sorkar na ka bynta ki synjuk ïalehkai kam shym long lehnohei. Te kumta ngi donkam ban ïai bteng ha kane ka bynta ban kyrshan ïa ki,” u la bynrap
“Ngin sa pyllait biang sa T. 23.37 klur kaba kynthup lang hangne ïa ka jaka sah ki nongïalehkai, ki jingbam tei met, bad ki jingleit shim bynta shabar. Ïa kine yn sa aiti sha ki synjuk ba kin pynïaid.”
U Bah Shylla u la ong ruh ba ki synjuk ïalehkai ki dei ban pynthikna ba ki nongïalehkai jong ngi ki dei ban ïoh ïa ki jaka sah kiba biang, ki jingbam tei met kiba biang bad ka jingïoh ban leit shim bynta shabar khnang ba kin long kiba la khreh ïalade hashwa ban sdang ka National Games 2027. “Ngim kwah tang ban shu pynlong ïa ka National Games, hynrei ngi dei ban ïoh takma bad kane ka long ka thong jong ngi. Ngi kwah ba ki khynnah jong ngi kin khur takma. Te kumta ngi kwah ïa ki ba kin long kiba trei shitom nangne shakhmat khnang ba kin ïoh ban kheit ïa u soh ka jngjop.”
“Ngi la wanrah ïa ka Meghalaya Outstanding Direct Appointment Policy. Lada phi lah ban pynurlong ban khur takma ha ka National Games 2027 phin ïoh rung kam sorkar khlem da donkam ban ïaleh eksamin, phim donkam ban wan sha nga ne ban kylli, hynrei ka kam ka la ap lypa,” la bynrap biang utei u Myntri.
