Imphal, Jymmang:
Shi sngi hadien ba lai ngut ki nongïalam balang kiba dei na ka jaitbynriew Kuki ki la shah siat ïap ha ki suba lehnoh, u Myntri ka tnat ki kam poh ïing ka jylla Manipur u Govindas Konthoujam ha ka sngi Palei u la ong ba palat 38 ngut ki briew kiba dei na ka jaitbynriew Naga, Kuki ki la shah kem bad shah set mraw ha ki kynhun bapher bapher ha ka jylla.
“Ha baroh, ki la don palat 38 ngut ki briew na baroh ar tylli ki jaitbynriew kiba la shah kem ha ki kynhun bapher bapher. Ngi dang pynlong ïa ka jingïakren kaba tyngeh bad ki seng bhalang bad ki nongïalam saiñ pyrthei ban pynthikna ïa ka jingpyllait ïa ki,” ong u Konthoujam ha ki nongthoh khubor.
Ka jingkulmar kaba thymmai ka la ktah ïa ka jylla Manipur ha ka sngi Balang, ha kaba ki suba lehnoh ki la siat ïap ïa lai ngut ki nongïalam balang bad pynmynsaw ïa saw ngut kiwei pat ha ka distrik Kangpokpi, katba uwei u riew paidbah u la shah siat bad ka kurim jong u ka la mynsaw ha ka distrik Noney, la ïathuh ki heh pulit.
U Konthoujam u la kren ïa kane haba leit jngoh ïa ka ïing ki sem jong uba la shah pynïap ha ka jingshah thombor kaba la jia hajan Jouzangtek ha Noney distrik ha ka janmiet jong ka sngi Balang.
La synran lang ïa u Myntri da ki lai ngut ki nongthaw aiñ jong ka jaitbynriew Naga ha ka jingleit jngoh ïa ka JNIMS hospital kaba don ha Imphal East district, ha kaba la buh ïa ka met ïap na ka bynta ban leh ïa ka post-mortem.
“Ngi la pyntip sha ka tnad ki kam pohïing jong ka sorkar pdeng bad ki jingpyrshang ki dang ïaid shakhmat ban pynthikna ban pyllait noh ïa ki. Ngi suba jur ba ki don katto katne ki briew ki bym kwah ba ka jingsuk kan wanphai biang ha Manipur,” ong u Konthoujam.
Ha ka janmiet jong ka sngi Balang, u Chairman ka shnong Taphou Kuki u L Chongloi u la ujor da ka jingthoh ha thanad Senapati, da kaba kynnoh ba 23 ngut ki trai shnong kiba ïaid ha ki hynriew tylli ki trok bad kawei ka kali ki la shah kem ha ki briew ki bym lah ban ithuh.
Ki Myntri Rangbah ka Mizoram bad Manipur, ki la pynrem ïa katei ka jingshah pynïap jong ki nongïalam Balang bad ki la dawa ruh ban kem mardor ïa ki riewthrang snam.
Ha kajuh ka por, ka jingim ba man ka sngi ka la shah ktah jur ha ka sngi Palei haba ym duna ïa lai tylli ki distrik jong ka Manipur –Kangpokpi, Churachandpur bad Chandel– namar ka jingkhang dam ba la khot da ki jaitbynriew Kuki Zo bad Naga pyrshah ïa ka jingshah pynïap jong ki lai ngut ki nongialam balang bad uwei u riew paidbah.
