Shillong, Jymmang 17
Ka Meghalaya Arm Wrestling Association (MAWA) ka la sei haduh 104 ngut ki rang bad ki ‘thei ïakhun kti ki ban mihkhmat ïa ka Jylla sha ka 4th PAFI National Arm Wrestling & Para Arm Wrestling Championship 2026 ka ban long ha Ahmedabad, Gujarat naduh ka 29 tarik mynta u bnai haduh 1 tarik u Jylliew.
Kane ka synjuk hapoh ka jingïalam jong u Bah Junestar Kharbuli kum u President ha ryngkat kitei ki nongïalehkai ki la ïakynduh ïa ka MLA ka Malki Laitumkhrah Constituency, Ka Kong Ampareen Lyngdoh ha ka ïingsah jong ka myn ha ka sngi Saitjaiñ. Te kumta kane ka nongmihkhmat ka la pyllait paidbah ïa ki jersey ïalehkai jong kane ka kynhun hashwa ba kin mih noh na nongbah Shillong ban leit sha Ahmedabad.
U Bah Junestar u la ïathuh ba ka MAWA ka la long kaba la khreh ban phah ïa kane ka kynhun ha la ki jong ki kyrdan bapher bapher ba kynthup ruh ïa kiba don jingduna ha ki dkhot met kiba lehkai ha ka para-athletes.
U la ïathuh ba kiba ïakhun ki dei ha ka kyrdan Sub Junior, Junior, Senior, Master, Grandmaster bad Para-Athletes. U la ïathuh ruh ba ka World Championship mynta u snem kan long haoh ruh ri India bad ka long ka kabu kaba biang eh ïa ka Jylla ban sei ïa ki samla bad ki rangbah ban ïakhun ha kane ka lympung kaba hehduh ha pyrthei.
Ha kawei pat ka liang ka Kong Ampareen ka la ai ka jingïaroh ïa ka kynhun jong ka MAWA kaba la lah ban ailad khamtam ïa ki samla ba kin kiew ha ka kam ïalehkai. Ka la ïathuh ba na ka liang jong ka, kan noh synñiang T. 2 lak tyngka sha kane ka kynhun hashwa ba kan leit sha Ahmedabad.
Ka Kong Ampareen ka la ong ba ka sngew ba long ba donbok ban don bynta ha ka ban pyllait paidbah ïa kine ka jersey ïalehkai kiba long ka jingithuh ïa ka kynhun ïalehkai ka Jylla ha katei ka lympung.
Ka la ai mynsiem ruh ïa ki rang bad ki ‘thei ïalehkai kin lah ban lehkai bha bad ai ruh ka kyrkhu kyrdoh ïa kane ka kynhun da kaba ong ba U Blei un aibor, un synran ïa ki baroh, bad da ka jingdon ryngkat jong u, kin lah ban wanrah ïa ka nam ka burom na ka bynta ka MAWA bad ïa ka Jylla hi baroh kawei.
