Guwahati, Jymmang:
U Sanjay Singh ha ka 16 tarik u Jymmang u la kyrpad ïa ka sorkar pdeng ba kan pynjlan ïa ka jingïarap pisa na ka bynta uwei u heprit ba dang khynnah ba dang 17 bnai na Assam uba don ïa ka jingpang Type-1 Spinal Muscular Atrophy (SMA), ka jingpang kaba duna bha ha ka met kaba donkam ïa ka injekshon kaba shongdor kumba T.9 klur.
Haba kren ha ka jingïalang bad ki nongthoh khubor ha New Delhi, u nongïalam ka seng AAP u la kyntu ïa u Myntri Rangbahduh ka ri u Narendra Modi, u Myntri ka tnat ka kkoit ka khiah jong ka sorkar pdeng u J. P. Nadda bad ïa u Myntri Rangbah ka Assam u Himanta Biswa Sarma ban ïarap ïa ka longïing jong une u heprit ban pynbeit ïa ka pisa na ka bynta kane ka jingsumar ban pynim ïa une u khynnah.
U Singh u la ong ba une u khynnah u la ïaleh pyrshah ïa ka jingpang kaba jur bha ha ka rta kaba dang rit bha bad ka ïing ka sem kam lah ban kit ïa ka jinglut kaba heh bha jong ka injekshon kaba donkam ban sumar.U la ong ruh ba un thoh kyrpang sha u Modi, u Nadda bad u Sarma ban pan jingïarap bad jingkyrshan mardor ha kane ka bynta.
U kpa jong une u heprit, uba la don lang ha ka jingïalang bad ki nongthoh khubor, u la kyrpad ïa ka jingïarap ban pynim ïa ka jingim jong u khun jong u. Ïa ka jingpang dohksah jong u khun kaba ktah ïa u budlum jong ka Type-1 la shim ba ka dei kawei na ki jait jingpang ba shyrkhei tam jong ka SMA, ka jingpang kaba duna bha kaba ktah ïa ka jingkhlaiñ bad jingkhih jong ki dohksah ha ka ban lah ban ïarap ïa une u heprit ba un khih un ksar.
