Shillong, Jymmang 17
Ka kynhun ïalehkai U-20 ka Jylla ka la bteng ban khur ïa ka jingjop kaba saw ha ka lympung ïalehkai Swami Vivekananda U-20 Men’s National Football Championship 2026, hadien ba ka la lah ban pynliem noh ïa ka Rajasthan da 3-0 kol ha ka sngi U Blei.
Kane ka nam jop ka la pynlong ïa ka Meghalaya ba kan bat ï aka kyrdan ba hakhlieh ha ka Group-A ha kaba ka la kamai 12 poiñ bad ka la jam syndon sha ka quarter final ha kane ka jingïakhun kaba ka long ha Narainpur, Chhattisgarh.
Ka jingpynïalehkai ha ka por 7:30 mynstep ka la long kaba kaba biang eh na ka bynta ki khynnah ïalehkai kane ka kynhun hapoh ka jingïalam u Bah Jeffrey Warlarpih (coach) ha kaba ka la lah ban ïalehkai bha naduh kaba sdang ha kaba ka la ïoh ban pynkhi jar nyngkong eh lyngba u Mebanlamlynti Masharing (3′) hadien ba u Imeral Jana u la shut ïa ka ‘corner’.
Kane ka jingïoh ban pynkhih jar ka la nangpynïoh mynsiem ïa kane ka kynhun bad tang hadien katto katne por ka la thep biang ïa ka kol kaba ar ha ka minit kaba 17 lyngba u Ryan Gibbs Kharnaior. Kane ka la wan lyngba ka jingïalehkai bha ki lai ngut ki rangïalehkai ka Meghalaya ha ka bynta kaba shkhmat ha kaba ki san ngut ki rangïalehkai ‘dien ka Rajasthan kin shym la lah ban khanglad bad u Ryan u la ïoh ïa kabu kaba biang ban thep ïa katei ka kol kaba ar.
Hadien shiteng kynta u Pherman -bha Lyngdoh (38′) u la thep ï aka kol kaba lai na ka bynta ka Meghalaya. Haduh kaba kut ka jingïalehkai jong ka kylla miet ka Rajasthan kam shym la lah ban pynphai bad ha kaba kut ka la mad ï aka jingshah rem.
Lah ban kdew ba ha ki jingïalehkai ba la lah, ka Meghalaya ka la lah ban pynliem nyngkong ïa ka Bihar da 3-1 kol ha ka 9 tarik mynta u bnai, kumjuh ïa ka Jharkhand da 5-0 kol ha ka 11 tarik bad ïa ka Andhra Pradesh da 8-1 kol ha ka 13 tarik.
Te kumta ka Meghalaya kan ïakynduh pyrshah ïa ka kynhun nongjop ha ka Group-C ha ka jingïakhun quarter final.
