Shillong, Jymmang 18
U khlur ïalehkai ka Spain bad Barcelona u Lamine Yamal u lah ban duh shim bynta ha ka jingïalehkai kaba nyngkong na ka bynta ka ri jong u ha ka FIFA World Cup pyrshah ïa ka Cape Verde ka ban long ha ka 15 tarik u Jylliew, namar u dangdonkam ban ïoh ka jingkoit kaba pura na ka jingmynsaw.
Kat kum khubor la ong ba une u rangïalehkai ba dang 18 snem ka rta, un duh shim bynta ha katei ka jingïalehkai group pyrshah ïa ka Cape Verde ha ka 15 tarik bad u dangdon duh hapdeng ka jingartartien na ka bynta ka jingïakhun kaba ar pyrshah ïa ka Saudi Arabia ka ban long ha 21 tarik u Jylliew.
Katkum ki khubor, la ong ba ka Spanish Football Association ka la ïai bteng ban ïakynduh ïa ki bor pynïaid ka Barcelona lem bad u Yamal, ha kaba ki kynhun sumar jong ka ki la leit sha katei ka klob ban peit bniah ïa ka jinglong jingman jong une u khlur ïalehkai.
U Yamal u la ngat ha ka jingmynsaw ha lympung ïalehkai La Liga ha u Ïaïong ha kaba ka kynhun jong u ka la jop ïa ka Celta Vigo, ha kaba ka la pynlong ïa ka Barcelona ban duh ban pynïalehkai haduh kaba kut kane ka aïom ïalehkai namar u dangdonkam ban ïoh ïa ka jingkoit kaba pura hashwa ban sdang katei ka lympung ka ban long ha America, Mexico bad Canada ha kane ka aïom lyiur.
Ka Barcelona ka la ong ha ka por ba u Yamal un shah sumar kham bniah halor katei ka jingmynsaw, katba ki heh jong kane ka klob ruh ki la ïakynduh ïa ka RFEF ha ka sngi Thohdieng jong ka taïew ba la lah ban ïakren halor ka jingshah sumar bad ruh ka jingwanphai biang jong u.
Ka Spain kan pynkhreh ïa ka jingïalehkai group kaba khatduh ha ka FIFA World Cup pyrshah ïa ka Uruguay ha ka 26 tarik u Jylliew.
U Yamal uba la ïalehkai ha ki 45 tylli ki jingïalehkai ha baroh ki lympung ïalehkai na ka bynta ka Barcelona, u la lah ban pynurlong ïa kane ka klob ba kan rah ïa ka nam lahduh ha ka La Liga da kaba u la thep 24 kol bad ïarap pynbuh 16 sien.
La khmih lynti ba u Yamal un long uwei na ki nongïalehkai phutbol ba paw ha kane ka lympung ka ban long ha ri America, Canada bad Mexico. Naduh ba u la ïalehkai nyngkong eh na ka bynta ka Spain ha ka rta kaba 16 snem, u Yamal u la thep 6 kol ha ki 25 tylli ki jingïalehkai bad u la long u nongïalehkai uba kynsai na ka bynta ka ri jong u ha ka European Championship 2024.
Ban pynkhreh ïa ka World Cup, ka Spain, kan sdang shwa da ki jingïalehkai paralok pyrshah ïa ka Iraq ha Coruna ha ka 4 tarik u Jylliew. Hadien kan leit sha Puebla, Mexico ban ïakhun pyrshah ïa ka Peru ha ka 8 tarik.
