Itanagar, Jymmang:
Ka tnat shipai Indian Army, hapoh ka jingpeit jong ka Spear Corps, ka la pynlong ïa ka jinghikai ban ïada ïalade kaba shi taïew na ka bynta ki khynnah klas VI shaneng ha Menchuka Valley School ha Menchuka kaba don ha Arunachal Pradesh.
La pynlong da ka Spearhead Division, kane ka jingthmu ka thmu ban kyntiew ïa ka jingkoit jingkhiah ha ka met, ka jinglong ryntih bad ka jingsngewthuh shaphang ka jingïada ïalade hapdeng ki samla pule katba ka dang pynskhem biang ïa ka jingangnud jong ka tnat shipai ban pynkup bor ïa ki samla bad ka jingïatreilang bad ka imlang sahlang.
Ki nonghikai kiba dei ki shipai kiba la tbit ki la hikai ïa ki nongïashim bynta ha ki buit ba kongsan ban ïada ïalade, ka jingsngewthuh ïa ka jinglong jingman bad ki kam pynroi ïa ka jingshaniah ba la shna khnang ban kyntiew ïa ka jinglah ban ïakhun bad ki jingtbit ba kongsan ha ka jingim.
Ka prokram ka la sakhi ïa ka jingïashim bynta kaba sngewtynnad na ki samla pule bad ki nonghikai bad ka la ïoh ïa ka jingïaroh na ki nongshong shnong.
Nalor ki jinghikai treikam, kane ka Camp ka la pynleit jingmut ruh ban pynshlur ïa ki jinglong nongïalam, ka jingkitkhlieh bad ka jingtei ïa ka jaitbynriew hapdeng ki samla.
Ki shipai India ki la ong ba kum kine ki jingthmu shabar ki dang ïai bteng ban pynkhlaiñ ïa ka jingïadei bad ki nongshong shnong ha Arunachal Pradesh katba ki dang pynroi ïa ka jingshaniah markylliang, ka jingïatreilang bad ka jingkular lang sha ka lawei kaba donbor bad kaba shngaiñ.
