Agartala, Jymmang:
Ha ka jingkhynra kaba jur halor ka kam khaïi drok, ki pulit ka Tripura ki la ïoh ban kurup kumba 50 hajar tylli ki dawai kuli Yaba kiba shongdor kumba T. 2.5 klur bad ki la kem ruh ïa arngut ki briew ha ka jingkhynra ha North Tripura distrik.
Ïa kane ka jingkhynra la pynlong ha ka thaiñ Kadamtala kaba hap hapoh ka Dharmanagar subdivision da kaba pynshong nongrim ïa ki jingtip ba kyrpang jong ki nongsyntiat, hapoh ka jingpeit jong u Superintendent of Police ka North Tripura u Avinash Rai.
Kine ki arngut kiba la shah kem ki dei kiba la tip kyrteng kum u Gautam Das bad u Jasimuddin. Katkum ka jingong ki pulit, la suba ba baroh arngut ki don jingïadei bad ki kam buh bad khañi drok kiba ïadei bad ka kynhun khaïi kaba kham heh.
Ha kaba ïadei bad ka jingjia, ki pulit ki la buh da ka jingujor mukotduma hapoh ka jingtreikam jong ka NDPS ha Kadamtala Police Station.
