Shillong, Jymmang 19
U nongapkol ba la rim bha, u Manuel Neuer, u la pynkhreh ban wanphai biang sha ka kynhun ïalehkai jong ka Germany, hadien ar snem ba u la pynbna ïa ka jingshongthait noh ka jong u na ka kam ïalehkai bar ri.
Kat kum ki khubor la ong ba ba u coach katei ka kynhun u Julian Nagelsmann u la pyntip ïa ki rangïalehkai, kynthup ïa u rangïalehkai ba don jingkyrmen u Oliver Baumann, ha kaba utei u rangapkol ba la 40 snem ka rta un shah kynthup hapoh kane ka kynhun ïalehkai World Cup, ha kaba yn sa pynbna ha ka sngi Palei. Na ka liang u Nagelsmann u la kyntait ban ai ïa kano kano ka jubab halor ka jingwanphai biang utei u rangapkol uba la lah ban pynurlong ïa ka kynhun ban khur nam lahduh ha ka World Cup 2014.
Kumjuh ka German Football Federation (DFB) ka la kyntait ban ai ïa ka jubab halor katei ka jingthmu ban wanrah biang ïa u.
Lah ban kdew ba u Neuer u la shongthait noh na ka kam ïalehkai jong ka Germany hadien ka Euro 2024, ha kaba u la ïoh ban ïalehkai 124 sien ha ki lympung ïalehkai bar ri. Ha ka sngi Thohdieng, u la bteng ïa ka kontrak bad ka Bayern Munich ka ban kut haduh u snem 2027.
U Nagelsmann u la kyrshan beit ïa u Bau-mann kum u nongapkol uba hakhmat eh na ka bynta kane ka lympung ïalehkai mynta ka samoi, hadien ba u Marc-Andre ter Stegen u la ngat ha ka jingmynsaw.
Katba u Neuer u la lah ban ïalehkai ha kane ka aïom, da kaba u la lah ban khur ïa ka khusnam man of the match ha ka jingïa-lehkai ha kaba ka Bayern ka la jop da 2-1 ïa ka Real Madrid ha ka quarter final jong ka Champions Lea-gue, hynrei ka jingmynsaw ka la long ka jingeh kaba nang jur.
U Neuer u la duh ïa ki katto katne ki jingïalehkai ha kane ka samoi namar ka jingmynsaw ha ka kjat, ha kajuh ka kjat bad kane ka la wan jia kumjuh kumba long ha u snem 2022.
U la shah weng noh hadien shi kynta namar ka jingwan biang jong kajuh ka jingmynsaw ha ka jingïalehkai ba khatduh jong ka Bayern ha ka Bundesliga ha kane ka samoi ha ka sngi Saitjaiñ bad u don ha ka jingartatien na ka bynta ka jingïalehkai phainal jong ka German Cup ka ban long mynta ka taïew bad ka Stuttgart.
