Shillong, Jymmang 19
Ka Langsning FC ka la khur ïa ka jingjop kaba shiphew ha ka lympung ïalehkai 5th Meghalaya State League, hadien ba ka la pynliem noh ïa ka Nangkiew Irat SC da 6-1 kol ha ka sngi Ba-ar ha SSA Stadium.
Ha kawei pat ka jingïakhun jong ka Group-B, ka Rymbai Shkenshynriah SC ka la jop da 4-2 kol ïa ka Maram FC. Katba ka la wan lyngba ki kol ba la thep da u Hesmiki Rymbai (28′), Monush Lapang (31′), Skilful Tariang (61′) bad u Niphonghi Sumer (78′), katba u Santosh Teron (50′) bad u Jakchim K Marak (88′) ki la lah ban pynphai na ka bynta ka Maram.
Kumba ka long mynta dei tang ka Langsning kaba la lah ban khur jingjop ha baroh ki jingïakhun. Hynrei mynta ka sngi ka la lah ban ïalehkai bha naduh kaba sdang ha kaba u Samuel Phawa (18′, 21′) u la thep ar kol, kumjuh u Morningstar Khongkiang (58′) bad u snar thep kol kane ka kynhun u Nelson Rymbai (69′, 73′, 87’P) u la khur biang ïa ka hat-trick. Na ka liang ka Nangkiew Irat ka la lah ban pynphai kylla shi kol lyngba u Ronaldkydon L Nonglait (27′).
Ïa ka kol kaba nyngkong la lah ban thep lyngba ka jingïalehkai lang u Kyrmenskhem Mukhim, uba la pynbuh bol na ka bynta u Nelson, u bym shym la pynlehnohei ïa kane ka kabu ksiar. Ïa ki ar kol la thep da u Samuel na ka bynta ka Langsning hadien katto katne minit. Te kumta une u rangïalehkai u la kynjoh sha ki 13 ha kane ka lympung.
U Ronaldkydon u la lah ban pynduna na ka bynta ka kynhun jong u da kaba u la ïoh ban thep shi kol lyngba ka free-kick, hynrei kane ka jingïakhun ka la noh sha ka Langsning lyngba ka jingtrei shitom ki rangïalehkai ha ka kylla miet, ha kaba u Morningstar bad u Nelson ki la ïoh ban thep kol biang. Lyngba katei ka hat-trick, mynta u Nelson u la kynjoh sha ki 21 kol kiba u la thep ha baroh ki shiphew tylli ki jingïakhun na ka bynta ka Langsning.
Haba phai sha kawei pat ka jingïakhun, ka jingangnud ka Maram ka la neh tang shiphang por ha kaba ka la ïoh ïa ka kabu kaba biang, hynrei na ka liang u rephri u la rai ba ka dei ka ‘offside’.
Kumba ka long mynta ka Langsning ka dangïoh ban lamkhmat da kaba kamai 9 poiñ ha ka Group-B, ha kaba ka Shkenshynriah ka la wan ba-ar da kaba kamai 6 poiñ, ka Nangkiew Irat (3 poiñ) ka la wan balai bad basaw ka Maram khlem da lah ban kamai poiñ.
Ha ka sngi Balang ka jingïalehkai quarter final ka wat kaba ar jong ka Group-A kan long hapdeng ka Mawlai SC pyrshah ïa ka Rangdajied United FC ha ka por 2 baje nohphai sngi. Katba ka Nongkseh SSCC ïa ka Shillong Lajong ha ka por 6 baje janmiet. Ha ka wat kaba nyngkong kaba la long ha ka lah sngi U Blei, ka Mawlai ka la jop ïa ka Rangdajied da 2-1 kol bad ka Nongkseh ka la pynliem ïa ka Lajong da 2-0 kol.
