Imphal, Jymmang:
Ki bor pahara ki la sdang ïa ka jingkhynra ha Kangpokpi distrik jong ka Manipur ban pyllait im ïa kito kiba dang shah teh mraw ha ki kynhun kieng atiar, la ïathuh ki pulit ha ka lah sngi U Blei.
Ki jingpyntreikam ban synshar ïa ki jaka bad ki jingwad bniah ruh ki dang ïaid ha ki bynta bapher bapher jong ka thaiñ ri lum ban pyllait im ïa “baroh ki briew kiba dang jah bad ban kem ïa kito kiba donkti ban bat ïa ki briew kiba la shah rahbor”, la ong uwei u heh pulit.
Ki la don kumba 31ngut na ki 38 ngut ki briew kiba la shah pylait, kiba dei na ka jaidbynriew Kuki bad Naga, kiba la shah bat ha ki kynhun lehnoh ha Kangpokpi bad Senapati distrik, ha ka 14 bad 15 tarik u Jymmang.
Ïa kine ki briew la rah sha ki jaka bym pat lah ban ïathuh hadien ba ki suba lehnoh ki la siat ïap ïa lai ngut ki nongïalam balang bad pynmynsaw ïa saw ngut kiwei pat ha Kangpokpi ha ka 13tarik, Jymmang, katba uwei u riew paidbah u la shah siat bad ka kurim jong u ka la mynsaw ha Noney distrik.
“Kum ka jingbteng ïa ki kam ban pyllait im ïa ki briew kiba la jah, la pynlong ïa ka jingkhynra bad ka jingwad da ki bor pahara ha ki lum kiba don shaphang Shatei-lam- Mihngi jong ka shnong Leilon Vaiphei bad Kharam Vaiphei ha Kangpokpi distrik,” la ong ka kyrwoh ba la phah da ki pulit.
Ki la don 12 ngut ki kynthei Naga na ka shnong Konsakhul ha Kangpokpi bad saw ngut ki shynrang bad shiphew ngut ki kynthei na ka jaidbynriew Kuki ha Senapati distrik, kiba la long napdeng kiba la shah aiti sha ki bor pahara.
Kham hashwa, ki pulit ki la ong ba kum ka jingmih na ka “jingtreilang” jong ka bor synshar, ki bor pahara, ki nongïalam saiñ pyrthei bad ki sengbhalang, “kiba bun na ki riew paidbah kiba la shah kem, kiba dei na ki jaitbynriew bapher bapher, la pyllait noh da kaba suk”.
Ha kajuh ka por, ka United Naga Council, kaba dei ka kynhun seng kaba hehduh jong ka jaitbynriew Naga ha ka jylla, ka la pynlong ïa ki pakhang shnong hapdeng ki distrik ha ka National Highway 2 bad 37 naduh ka miet jong ka Sngi U Blei, da kaba dawa ban pyllait noh ïa ki 6 ngut ki shynrang Naga kiba la suba ba ki don ha ka jingshah teh mraw jong ki lehnoh.
Ka Kuki Inpi Manipur, ka kynhun seng ba hehduh jong ka jaidbynriew Kuki ha ka jylla, ka la kam ruh ba ki don 14 ngut ki dkhot jong ka kynhun, kiba dang jah rngai bad kiba dang shah bat mraw ha ki kynhun bapher bapher ha Senapati distrik.
