Guwahati, Jymmang:
U MLA ka Sivasagar bad u heh jong ka seng Raijor Dal, u Akhil Gogoi, ha ka sngi U Blei, u la kynthoh jur ïa ka sorkar Assam, halor ka jingpynbna jong ka jingthew jaka bad ki jingthmu pynkynriah shnong kiba lah ban ïadei bad ka projek shnong Tata ba la thmu ha Jagiroad, da kaba maham pyrshah ïa ka jingshah pynkynriah jaka jong ki trai ri trai muluk Tiwa bad kiwei kiwei ki jaidbynriew trai ri.
Ha ka kyrwoh ba la pynmih ha ka janmiet jong ka Sngi U Blei, u Gogoi u la kyrpad ïa u Myntri Rangbah ka Assam, u Himanta Biswa Sarma ba un ym leh ïa kaei kaba u la khot “ka jingbakla kaba khraw ha ka histori” da kaba beh shnong ïa ki trai ri trai muluk na Sindhisar bad ki jaka ba marjan na ka bynta ka projek shnong.
U la kynnoh ba ka jaka kaba la pyndonkam mynshwa na ka bynta ka Nagaon Paper Mill kaba la jah rngai mynta ka dei kaba dei jong ki riewlum bad ki trai ri trai muluk bad u la kynthoh ïa ka sorkar kaba la aiti ïa ka sha ka Tata Group na ka bynta ban pynroi ïa ki karkhana.
U nongïalam ka Raijor Dal u la kynnoh ba watla ka jaka kaba heh hapoh ka jaka shna kot Jagiroad ka dang sah khlem pyndonkam, hynrei la ïathuh ba dang pynlong ïa ki jingjurip bathymmai ha ki jaka ba shong ki Tiwa bad kiwei kiwei ki longïing trai ri trai muluk.
