Shillong, Jymmang 19
Ka Meghalaya kan sa pynthymmai biang ïa ka jingïateh ban pynlong ïa ka 39th National Games 2027, ha ka 30 tarik mynta u bnai ha kaba u Myntri ka Sorkar Pdeng ba dei khmih ïa ka tnat ïalehkai un wan iuhkjat ha kane ka nongbah na ka bynta ka jingïalang jong ka Eastern zone kaba ar sngi, la pynpaw u Myntri ka tnad ïalehkai u Bah Wailadmiki Shylla ha ka sngi Ba-ar.
U Bah Shylla u la ong ba ka Jylla ka la ïoh jingtip mynta ka taïew shaphang kane ka jingwan ka jong utei u Myntri.
“Dei hynnin ka sngi ngi la ïohpdiang ïa ka khubor. Ngam pat shym la ïohpdiang ïa kano kano ka jingthoh, hynrei kat kum ka jingïoh khubor la ong ba u Myntri ka Sorkar Pdeng ryngkat bad Myntri Khynnah lem bad kiwei ki heh ophisar ka tnat ïalehkai kin wan sha Shillong ha ka 28 tarik u Jymmang” ula bynrap.
Kane ka jingwan ka dei ruh halor ka jingpynlong ïa ka jingïalang jong ka Bharat Group na ka bynta ka Eastern Zone. “Ha ka 28 bad 29 tarik u Jymmang kan don ka jingïalang jong ki kynhun ka Bharat Group kiba don ha man la ki jylla. Kane ka jingïalang kan dei na ka bynta ka Eastern Zone kaban kynthup ïa baroh ki jylla ka thaiñ shatei lam mihngi, ka West Bengal bad ka Odisha,” la bynrap u Bah Shylla.
Ka kynhun jong ka Meghalaya ka la don ha New Delhi ha ka taïew kaba la lah ban ïakren halor ka jingïatehkular na ka bynta ka 39th National Games, ïa kaba la ïasoi nyngkong eh ha ki 8 snem mynshwa. “Ha ka taïew kaba la lah, ka kynhun na Shillong ka la leit sha Delhi ban ïakynduh ïa ki heh jong ka tnat ïalehkai ka Sorkar Pdeng ha kaba ïadei bad ka jingpynthymmai ïa ka jingïateh-kular ban pynlong ïa ka National Games ha u snem 2027.”
“Ki don ki bynta kiba hap ban pynbeit namar ba ka dei kaba la slem bha. Dei halor kane ba ngi kwah ban pynthymmai ïa ka jingïatehkular”.
U Bah Shylla ula ong, ba u Myntri ka Sorkar Pdeng uba khmih ïa ka tnat ïalehkai ula tyrwa ba ïa katei ka jingsoi jong ka jingïatehkular dei ban pynlong ha Shillong. “Haba ngi la ïakren bad ki, u Myntri dalade hi ula ong, ba kan bha shibun ba ngi leh ïa katei ha Shillong. Kumta katei kan sa jia ha ka 30 tarik u Jymmang” u la bynrap.
U la pynthikna ba katei ka jingïateh -kular ka dei kaba la pynkhreh, hynrei ka donkam ban pynkylla kumba la ai jingmut da ka Indian Olympic Association. “Ngi la dep ban ïasoi ïa ka jingïatehkular, hynrei ki la don pat katto katne kiba ngi hap ban pynbeit kiba la leh da ka IOA.”
U Bah Shylla ula ong, ba ki dangap ïa ki jingtip kiba bniah na ka kynhun kaba leit sha Delhi. “Ngam shim la don bynta lang ha katei ka jingïalang bad ka kynhun. Ïa mynta hi, ki dangpynkhreh, kumta ha kine ki khyndiat sngi ngin sa ïoh ïa ki jingtip kiba pura” u la bynrap.
“Kumba long mynta ki jingpynkhreh ki long kiba ïaid beit shaphrang. Ngam shim la ong ïa kane tang ba nga dei u Myntri ka tnat ïalehkai, hynrei nga ong ïa kane, hadien ba la dep wan jurip da ki heh ka tnat ïalehkai ka Sorkar Pdeng bad ka sien kaba khatduh ka dei na ka IOA. Bun ki briew kiba la wan jngoh ha ki jingtei ïa ki jaka ïalehkai ki la dap da ka jinghun mynsiem ha kaba ïadei bad ka jingpynkhreh ka jong ngi,” ula bynrap..
Ha kaba ïadei bad ki jingtei, ula ong, “Na ka bynta ki jingïalehkai ki bapher bapher, kin don la ki jong ki jaka ban ïalehkai. Kumba ka long mynta, ngi don bun tylli ki madan ïalehkai ban pynlong ïa ki jingïalehkai Indoor bad kiwei kiwei ki jingïalehkai bad ngi la don ruh ïa ki madan ïalehkai kiba ngi lah pynap lypa”.
Ka jylla ka la bhah T.600 Klur na ka bynta kane ka National Games bad ka la pan ruh ka jingïarap pisa na ka Sorkar Pdeng na ka bynta ban pyndep pura ïa ki.
“Ka jingmang tyngka baroh kaba ngi khmih kan kot ïa ka T.600 klur. Kumba long mynta, kane ka jingpynlut ka dangdei na ka Sorkar Jylla, hynrei ngi la ïaid shakhmat ban ïakren bad ka Sorkar Pdeng” u la bynrap da kaba ong, “Nga lah ban ong, da kaba thikna, kan shong baroh ha ka sorkar pdeng, hynrei ïa mynta hi, ngi dangïaid lyngba ka pisa jong ka Sorkar Jylla”.
