Shillong, Jymmang 20
Ka Tnat Directorate of Sports and Youth Affairs, jong ka sorkar Meghalaya ha ryngkat ka jingïatreilang bad ka Meghalaya Athletics Association, ka la pynlong ïa ka State Level Inter-School Athletics Meet 2026 ha SAI STC Shillong, Mawkynroh, NEHU Campus, kaba la wanrah lang ïa ki samla ïalehkai na kylleng ki jaka jong ka Jylla ban ïakop lehkai ha ka kyrdan kaba heh tam (highest school-level platform). Kane ka lympung kan long 3 sngi lynter naduh 20 haduh 22 tarik Jymmang 2026.
Ha ka sngi plie ïa kane ka jingïakob, la pynlong ïa ki katto katne ki jingïalehkai, kynthup ïa ka ‘Long jump, High jump, 60m race, 100m race, Javelin throw, 600m race, 4x400m relay, Long jump kaba 5m runway bad ka Javelin throw kaba 10m runway, bad kiwei kiwei de.
La wan shim bynta ruh na baroh 12 tylli ki district ha ki 48 tylli ki jingïalehkai ha ka State Level Meet, kaba pynlong ïa ka kynhun kaba don haduh 900 ngut ki nongïalehkai bad ki nongpynïaid jong ka kynhun.
U Working President ka Meghalaya State Olympic Association (MSOA) u Bah John F. Kharshiing haba ai jingkren u la ai khublei ïa ki nongïalehkai kiba ïashim bynta namar ba ki la ïoh ïa ka lad ban mihkhmat ïa la ki jong ki Distrik ha kane ka lympung ïalehkai ha ka kyrdan jong ka ‘state-level championship’.
Haba pynpaw ïa ka jingdonkam jong kum kane ka lympung ïalehkai, u Bah Kharshiing u la batai ïa ka kum ka nongrim jong baroh ki jingïalehkai, kaba ïarap ïa ki nongïalehkai ban pynroi ïa ka jingsted, ka jinglah ban shah, ka bor ne ka jingkhlain, ka jingpyrkhat bad ka jinglong (character). U la pynshlur ïa ki nongïashim bynta ban ïaineh ha ki thong jong ki bad ban ym shah pynduh mynsiem ha ki jingshah pynphaidien ne ki jingeh.
“Ka jingïashim bynta kala dei lypa hi ka jingjop. Ka jingshlur ban ïakhun bad ka jingkut jingmut ban ïai bteng ki dei ki jinglong ba shisha jong u nongjop”, u la ong.
Da kaba shim nuksa bad ai mynsiem na ki nongïalehkai ba pawnam ha ka pyrthei kynthup ïa u Jesse Owens bad Usain Bolt, u Kharshiing u la ban jur ïa ka jingdonkam jong ka jingryntih (discipline), ka jingaiti lut bad ka jingtrei shitom ban ïoh ïa ka jingjop ha ka jingïalehkai.
U la pyntip ruh sha ki nongïalehkai bad ki kmie ki kpa ba ka jylla Meghalaya kan sa pynlong ïa ka National Games kaba 39 ha u Lber 2027, da kaba batai ïa kane kum ka kabu kaba don ha ka histori ïa ka Jylla. U Bah Kharshiing u la ai khublei ïa u Myntri Rangbah ka jylla Meghalaya u Conrad K. Sangma bad ïa u Myntri ka Tnat Ïalehkai u Wailadmiki Shylla kiba la pynkhlaiñ ïa ka kam ïalehkai jong ka Jylla lyngba ka jingpynshlur ïa ki nongïalehkai, ki scholarship bad ka jingpynroi ïa ki jingtei.
U la pyntip ruh ba ka khusnam pisa ïa ki nongïalehkai kiba ïoh takma ksiar ha ki jingïakob national la pynkiew bha na ka Rs. 7,500 sha ka Rs. 60,000, katba ïa ki nongïalehkai kiba ïoh takma ha ki National Games, International ruh yn pynthikna ïa ki ban ïoh kam sorkar – ka sienjam kaba u la batai kum ka jingpynshlur kaba khraw ïa ki samla ïalehkai ha kylleng ka Meghalaya.
U Bah Kharshiing u la kdew shuh shuh ba ïa ki jingtei haba ïadei bad ki kam ïalehkai, kynthup ïa ki madan bad ki jaka ai jinghikai, la pynbha ha kylleng ka jylla ban pynmih ïa ki nongjop ha ka lawei ha ka kyrdan jong ka ri bad ka pyrthei.
Haba ban jur ïa ka bynta jong ka jingïalehkai ban kyntiew ïa ka jingïatylli bad ka jingpynroi ïa ki kolshor, u la pynkynmaw ba kumno ka Meghalaya Games kaba la dep ka la pynlah ïa ki nongïalehkai na ki distrik bapher bapher ban leit jngoh ïa ki jaka thymmai bad ban tei ïa ki jingïadei paralok kaba kham skhem.
U la kyntu ïa ki nongïalehkai ban ïalehkai da ka jinglong hok, ka jinglong ryntih bad ka mynsiem ïalehkai (sportsmanship).
“Ïa u nongjop ym shym la pynmih ha ka ‘gym’. Ïa u nongjop la pynmih na ka jingkut jingmut kaba jylliew, ka jingangnud bad ka thmu beit ban poi sha ka kyrdan ba ha khlieh duh,” u la ong haba kitbok kitrwiang ïa ka State Level Inter-School Athletics Meet 2026 ba kan long kaba jop bad ki jingïalehkai kiba sah jingkynmaw.
Ha kane ka sngi, u Bah John F. Kharshiing u la pynher ïa ka lama kum ka jingplie ïa kane ka jingïakop bad pynbna paidbah ïa ka State Level Inter-School Athletics Meet 2026 kaba la plie ha ka jingïadonlang u Assistant Director ka tnad Sports and Youth Affairs u Bah P.B. War Nongbri, u DSO, ki ophisar bad kiwei ki riew pawkhmat.
