Shillong, Jymmang 21
U rangapkol ka Aston Villa, u Emiliano Martinez, u la pynkyndit ïa ki paidbah nongkyrshan hadien ba u la pynpaw ba u la ïakhun ïa ka phainal jong ka UEFA Europa League ha ryngkat ka jingkdiah ka shympriah kti.
Une u khlur ïalehkai ka Argentina u la mad ïa kane ka jingmynsaw ha ka por ba ki dangkilanmet ha ka jingpynkhreh hashwa ba ka Villa kan ïakhun pyrshah ïa ka SC Freiburg ha Istanbul. Wat hapdeng kane ka jingmynsaw, pynban u Martinez u la rai ban bteng ïa ka jingïalehkai bad ban ïakhun tyngeh kat haduh ban da lah ban pynliem da 3-0 kol.
Katei ka jinglah ban ïalehkai bha ka la long kawei na ki mat ba la ïakren bha da ki paidbah hadien ba ka Aston Villa ka la rah ïa ka nam lahduh ha ka sien kaba nyngkong eh ha ki laiphew snem.
Ha katei ka jingïakhun u la lah ban ïalehkai bha haduh kaba kut ka jingïalehkai wat hapdeng ka jingshah sop ka shynriah kti kaba don ha ka jingmynsaw hadien ba u la ïoh jingsumar na ki doctor jong kane ka klob. Une u nongapkol uba la lah ban pynjop ha ka FIFA World Cup, u la lah ban leh ïa ki kam kiba phylla na ka bynta kane ka klob ban pyllait na ka jingshah thep kol watla ka Villa ka la ïoh ïa ki kabu kiba biang.
Ïa kitei ki kol la thep da u Youri Tielemans, Emiliano Buendia, bad u Morgan Rogers ki la pynskhem ïa ka jingjop na ka bynta katei ka kynhun jong ka Premier League.
Hadien ka jingïalehkai, u Martinez u la kam ba u la lah ban khanglad ïa ki bol kiba la dei ban shah thep namar ka jingmynsaw, hynrei um lah khlem da sngewsarong ba u la lah ban bteng ïa ka jingïakhun na ka bynta ka kynhun jong u bad ban pynurlong ïa ka jingjop ha ka sien kaba nyngkong eh.
U Martinez u la ong ba katei ka jingmynsaw ka la jia ha ka por ba dangpynkhreh ïa ka jingkilanmet bad mar kumta hi ka la wan ka jingeh ha u.
U la ïathuh ba man ka por ba u pyrshang ban kem ïa ka bol, ka kti jong u ka ïaid beit. Hynrei une u nongap kol uba 33 snem ka rta um shym la kwah ban un don hapdeng ka jingmynsaw namar kan pynduh noh ïa ka jingïalehkai. Ha ka jaka kata, u la shim ba ka dei kawei pat ka lynti ha ka jingim jong ka jingïalehkai phutbol jong u bad u la rai ban bteng ban ïalehkai wat hapdeng ka jingpang jong ka kti.
Hadien ka jingïalehkai, une u nongapkol na Argentina u la lehkmen namar ka jingjop ryngkat bad ki paralok jong u. U Martinez u la pynthikna ruh ba u khmih lynti ba un long uba la khreh pura ban mihkhmat sa ïa ka kynhun ïalehkai phutbol jong ka ri jong ka Argentina ha ka FIFA World Cup ka ban long ha u Jylliew mynta u snem.
Kane ka kynhun jong u Lionel Scaloni kaba la bat ïa ka nam lahduh ha ki saw snem mynshwa, kan ïakhun pyrshah ïa ka Jordan, Algeria bad ka Austria ha ka jingïalehkai group.
