Imphal, Jymmang:
U Myntri Rangbah jong ka Manipur u Y Khemchand Singh, ha ka 22 tarik, Jymmang, ka la buh ka jingkyrpad ïa ki briew ha ka jylla, ba kin kiar na ki jingkhot pakhang bad jingkhang khyrdep, da kaba ong ba kum kine ki jingïakhih, ki ktah jur ïa ki nongbylla sngi bad ki pynsniew ïa ka jingeh ha ka ïoh ka kot, kaba mih na ka jingkulmar kaba dang ïai bteng.
Haba kren ha ka jingplie ïa ka jingkieng RCC halor ka wah Nambul ha Akham Mayai Leikai ha Imphal West distrik, u Myntri Rangbah u la kyntu ïa ki nongshong shnong ban “wan shakhmat na ka bynta ka jingïakren” bad ban pynbeit ïa ki jingïapher jingmut lyngba ka jingïakren ha ka jaka ban khot pakhang shnong.
“Ka jingpynjari ïa ki jingkhot pakhang shnong namar ka jingbitar ïa ka sorkar ka wanrah tang ïa ka jingeh, khamtam eh ïa ki nongbylla sngi,” ong u Singh haba kren ha ka jingïalang.
Haba kyrpad ban tehlakam, u Singh u la ong ba ïa ka jingsngewsih ne jingbitar pyrshah ïa ka sorkar dei ban pynbeit lyngba ki jingïakren bad jingïasngewthuh jingmut lang ban ïa ki jingïakhih kiba pynthut.
Hadien kata, ha ka jingthoh ha ka Social Media, u Myntri Rangbah ka jylla u la ong ba kane ka jingkieng kaba dang shu plie thymmai ha Lamsang Assembly Constituency kan pynbha ïa ka jingpynïasoh, kan pynsuk shibun ïa ka leit ka wan jong ki briew bad ki mar ki mata, bad kan kyrshan ruh ïa ki ïew ha ka thaiñ hi baroh kawei.
