Aizawl, Jymmang:
Ka sorkar Mizoram ha ka 20 tarik Jymmang, ka la plie paidbah ïa ka Online Medical Referral System hapoh ka Mizoram Universal Health Care Scheme (MUHCS) ban pynsuk ïa ki rukom phah sumar ïa ki nongpang kiba donkam ïa ka jingsumar shabar ka jylla.
Ïa kane ka Digital platform, kaba la shna kyrpang na ka bynta ki nongtrei sorkar, la plie paidbah da ka Myntri ka tnat ka koit ka khiah ka Lalrinpuii ha Aizawl.
Haba kren ha kane ka jingpynlait paidbah, ka Myntri ka la ong ba kane ka jingthmu ka dei ka sienjam kaba kongsan ban pynbha ïa ka jingsynshar ha ka koit ka khiah bad ban pynkhlaiñ ïa ka jingai jingsumar paidbah lyngba ki lad ki lynti kiba la pyntreikam da ka teknoloji.
Ka la ban jur ïa ka jingdonkam ban pyntreikam hok ïa ka rukom treikam, khamtam ha ki jingshah phah sumar kyrkieh, bad ka la kyntu ïa ki heh ka koit ka khiah bad ki ophisar ka koit ka khiah ban pynthikna ïa ka jingtreikam kaba ïaid beit ïaid ryntih jong ka.
“Ka Online Medical Referral System dei ban pyntreikam da kaba shisha bad kaba janai khnang ba kan shakri ïa ka jingthmu ba la buh”, la ong ka Myntri.
Ka Lalrinpuii ka la pynpaw ruh ïa ka jingroi jong ka Mizoram ha ka rukom ai jingsumar Digital, da kaba kdew ba palat 46,000 tylli ki longïing ki la dep pynrung kyrteng hapoh ka rynsan pynrung kyrteng Online jong ka MUHCS.
Ki heh sorkar ki la ïathuh ba ïa kane ka Portal la shna lang da ka Directorate of Hospital and Medical Education (DHIME) bad ka Mizoram State e-Governance Society (MSeGS) ban pynduna ïa ka jingpynslem ba ki nongtrei sorkar ki ïakynduh kiba pan jingbit ban phah sumar shabar ka jylla Mizoram.
Kham hashwa, ki Medical Referral Board ki treikam tang na Aizawl bad Lunglei, ha kaba ki nongpang ki dei ban pyndep ïa ki kot ki sla lyngba ki ophis kiba bun shwa ban ïoh ïa ka jingmynjur.
Hapoh kane ka rukom treikam kaba thymmai, mynta la thaw ïa ki District Screening Committee (DSCs) ha kylleng ki jaka sumar jong ki distrik ban bishar bniah ïa ki jait jingpang ba la don ha ki jaka sumar.
Ïa ki jingai jingmut jong ki yn pynïadei bad ki board ba phah sumar ha Aizawl bad Lunglei lyngba ka jingïalang lyngba ka durkhih, kaba pynduna shibun ïa ka por ban pyntreikam.
Ki nongaplai ki lah ban pan jingmynjur ban phah sumar shipor da ka Online da kaba siew ïa ka bai pynrung kyrteng da T.20.
Ki nongtrei sorkar kin lah ruh ban upload beit beit ïa ki shithi Forwarding bad ki kot ki sla jong ka Medical Board lyngba kane ka portal shwa ban ai jingtip sha ka Mizoram State Health Care Society (MSHCS) na ka bynta ki rukom treikam ba kham bniah.
Hynrei ki nongïoh jingmyntoi hapoh ka kyrdan ba kyllum jong ka MUHCS kin dang bteng ban aiti ïa ki kot ki sla kiba donkam da kaba ai da ka met ha ki ophis jong ka MSHCS.
Ki heh sorkar ki la pynshai ba ka jingmynjur ba khatduh na ka bynta ki phah sumar kan dang donkam ban pynshisha met ïa ki kot ki sla, kaba donkam ïa ki nongpang lane kiba haïing kiba la ai bor ban leit sha ka ophis jong ka Directorate of Hospital bad Medical Education ha ka por treikam.
Kane ka jingthmu la khmih lynti ba kan pynbha ïa ka jinglah ban ïoh bad pynsuk ïa ki rukom pynïaid ïa ki nongpang kiba donkam ïa ka jingsumar ba kyrpang shabar jong ka Mizoram.
