Shillong, Jymmang 22
Ka Pynthorbah SC ka la pynliem noh ïa ka Mawshbuit SC da 2-0 kol na ka bynta ban khur jingjop ha ka lympung ïalehkai SSA U-20 4th Division Football League 2026 ha ka sngi Thohdieng ha madan MFA kaba ha Polo.
Kane ka nam jop ka la wan urlong lyngba u Wankmen Kharmalki uba la thep ha ka minit kaba 29 bad u Pynshngaiñ Khapow ha ka minit ba 69 na ka bynta ban khur ïa ki lai poiñ.
Haba phai sha kawei pat ka jingïakhun kaba la long kham hashwa hapdeng ka Nongpiur SS&CC bad ka Mawphlang SC ki la ïasam mar shi poiñ hadien ba ki la ïakhaid mar 1-1 kol. Ka Nongpiur ka la pynkhih jar nyngkong eh lyngba u Pynwanlang Nongneng ha ka minit kaba 40, hynrei ka Mawphlang ka la pynphai kylla lyngba u Kestar Kharshiing (60) na ka bynta ban ïakhaid mar shi kol.
Kane ka lympung kan bteng biang mynta ka sngi Saitjaiñ hapdeng ka Nongkseh United FC pyrshah ïa ka New Challenger FC ha ka por 1 baje mynsngi bad ka Laitkroh SC ïa ka Mawnianglah Youth SC ha ka por 4 baje nohphai sngi.
