Shillong, Jymmang 22
Ka kynhun ïalehkai na East Khasi Hills district ka la rah ïa ka nam ‘Overall Champions’ ha ka State Level Inter-School Athletics Meet 2026 ba la pynlong da ka tnat ïalehkai ka Sorkar Jylla ha ryngkat ka Meghalaya Athletics Associa-tion, kaba la poi sha kaba kut ha ka sngi Thohdieng ha SAI Training Centre, Shillong.
Ka East Khasi Hills ka la khur ruh ïa ka nam lahduh ha ka liang ki shynrang (Best Boys Team), katba ka North Garo Hills ka la wan ba-ar. Ha ka liang ki kynthei, ka East Khasi Hills ka la ïoh ïa ka nam ‘Best Girls Team’, katba ka West Jaiñtia Hills ka la wan ba-ar.
Ha kane ka sngi pynkut ïa kane ka lympung, la ïadon lang u Myntri ka tnat ïalehkai u Bah Wailadmiki Shylla, uba la ai khublei ïa ki nongpynïaid, ki nongshim bynta bad kiwei kiwei kiba la don bynta lang ha kaba kane ka lympung ka long kaba seisoh.
Haba kren sha ki samla pule bad ki nongïalehkai, u Bah Wailad u la ong ba uwei pa uwei u nongïashim bynta u dei ban sngew sarong namar ba u la poi shaduh kane ka ka kyrdan ïalehkai, da kaba bynrap ba ki la dep ban pynpaw ïalade kum ki nongïalehkai da kaba ki la wanrah burom ïa ka ïing ka sem, ki skul, ki district bad ka jylla. U la pynkynmaw ïa ki nongïashim bynta ba watla ka jingïoh takma ka lah ban long kaba shipor, hynrei ka jinglong adkar, ka jingtrei shitom bad ka mynsiem ïalehkai ki dei ban ïaisah shirta ka jingim jong ki.
U Myntri u la pynpaw ïa ka jingkmen halor ka jingnang kiew ka jingïashim bynta bad ka jingpynbha ïa ki jinglehkai ha kylleng ki district. U la kdew ba wat hapdeng ki jingeh ha ki jingtei ha ki por ba la leit, ka sorkar ka la nangpynïar shibun ki jaka ïalehkai ha kylleng ka jylla hapoh ka jingïalam u Myntri Rangbah ka Jylla Conrad K. Sangma.
U Bah Shylla u la ïathuh ba ki Synthetic Athletic Track la dep ban shna ha Shillong bad ha Wahïajer, ha kaba kum kine ki projek ki dang-ïaid shakhmat ha Tura, Mawkyr-wat, Baghmara bad ha kiwei ki district. U la ong ba ka jingthmu jong ka sorkar ka long ban pynthikna ba manla kawei pa kawei distrik kan don ïa ki jaka ïalehkai kiba biang ban ïarap ïa ki samla ïalehkai ban pyntbit bad pyni ïa ki sap jong ki.
Shuh shuh u la pynpaw ïa ka jingkiew jong ka jingbei tyngka jong ka sorkar ha ki kam ïalehkai, ha kaba ka tnat ïalehkai ka la pynlut T.40 klur ha ki hynñiew snem mynshwa, hynrei mynta ka la pynlut haduh T.844 klur.
Ïa ki khusnam shimet, u Ewandame Mark Syiemlieh (East Khasi Hills) u la ïoh ïa ka nam Best Athlete ha ka U-14 Boys na ka bynta ka high jump, katba ka Lamsaka Dkhar (East Jaiñtia Hills) ha ka U-14 Girls na ka bynta ka long jump. U Highbornson Muksor (East Jaiñtia Hills) u la ïoh ïa ka nam Best Athlete ha ka Under-16 Boys, katba ka Amandy Rumnong (East Khasi Hills) ha ka Under-16 Girls. Ha ka Under-18, u Cherim Ch Sangma (North Garo Hills) u la ïoh ïa ka nam Best Athlete ha ka liang ki shynrang bad ka Tusame N Marak (East Khasi Hills) ha ka liang ki kynthei.
Kiwei kiba la ïadon lang ki long u Working President ka MSOA Bah John F. Kharshiing, u Director ka tnat ïalehkai u D.D. Shira, u Assistant Director Bah P.B. War Nongbri, Bah EMH Passah, ki district sports officer bad kiwei kiwei.
