Shillong, Jymmang 22
Ka kynhun ïalehkai ka Jylla kan ïakynduh pyrshah ïa ka Kerala ha ka jingïakhun quarter final jong ka Swami Vivekananda U-20 Men’s National Football Championship 2026 mynta ka sngi Saitjaiñ ha Narainpur, Chhattisgarh.
Kine baroh ar ki kynhun ki dei kiba jop ha ki jingïalehkai group. Te kumta kane ka jingïakhun kan long ha ka por 7 baje mynstep.
Kumba ka paw ka Meghalaya ka la ïoh ban bat ïa ka kyrdan ba hakhlieh ha ka Group-A da kaba kamai 12 poiñ hadien ba ka la lah ban pynliem ïa ka Bihar da 3-1 kol ha ka 9 tarik, kumjuh ïa ka Jharkhand da 5-0 kol, 8-1 kol ïa ka Andhra Pradesh ha ka 13 tarik bad da 3-0 kol ïa ka Rajasthan ha ka 17 tarik.
Kane ka jingïakhun kan long kaba kham eh na ka bynta ka kynhun jong u Bah Jeffrey Warlarpih (coach) lem bad ki khynnah jong u namar kan ïakynduh pyrshah ïa ka Kerala, kaba long ka kynhun ba khlaiñ bor na ka Group-C.
Ha ki jingïalehkai ba la lah, ka Kerala ka la pynliem ïa ka Chandigarh da 5-1 kol ha ka 13 tarik, kumjuh ïa ka Uttarakhand da 3-0 kol ha ka 15 tarik, ïa ka Andaman & Nicobar Islands da 12-0 kol ha ka 19 tarik bad ïa ka Jammu & Kashmir da 6-1 kol ha ka 21 tarik mynta u bnai.
Kine ki kynhun ki la ïakynduh teng ha kane ka lympung kaba la long ha u snem ba la lah. Ha katei ka lympung ka Meghalaya bad ka Kerala ki la shah pynngat ha kajuh ka group, ha kaba ka Meghalaya ka la jop da 2-1 kol.
Te kumta la khmih lynti ba kane ka kynhun ïalehkai ka Jylla kan ïalehkai bha khnang ba kan lah ban khur ïa ka jingjop bad ban jam sha kawei pat ka wat jingïakhun.
