Shillong, Jymmang 24
Ka hat-trick ba la ïoh da u Harry Kane ka la biang pura ïa ka Bayern Munich ban pynliem noh ïa ka VfB Stuttgart da 3-0 kol ha ka final jong ka German Cup, ba la tip kum ka DFB Pokal.
Kane ka jingjop ka la pynurlong ïa kane ka kynhun ba kan khur jingjop ar sien hadien ba ka la rah ïa ka nam lahduh ha ka lympung Bundesliga kham hashwa mynta ka aïom.
Kane ka jingïalehkai final kam da long kaba pynhun ïa ki paidbah nongkyrshan, kiba la pynpaw ka jingpyrshah ïa ka German Football Association halor ka jingthmu ban buh ïa ki lad jingïada. Ki nongkyrshan na baroh ar tylli ki klob ki la rah la ki banner bad pynbthei ïa ki bom pataka, kaba la pyndap ïa ka stadium da ka tdem bad ka la wanrah ka jingbym lah ban ïohi bha ha ka por ba ïalehkai.
Hapeng kine ki kynrum kynram, u Kane u la mih madan ha ka kylla miet. Te kumta u la ïoh ban pynkhih jar ha ka minit kaba 55 hadien ka jingïarap pynbuh da u Michael Olise. Hadien katto katne ki nongkyrshan ka Bayern ki la thang ïa ki bom pataka ha kaba ka la hap pynsangeh shipor ïa ka jingïalehkai na ka daw ka jingtdei thui ha madan.
U Kane u la bteng ban buh jingma biang ïa ki rangïalehkai ‘dien ka Stuttgart bad u la ïoh ban thep biang ïa ka kol kaba ar hadien ka jingïarap lang da u Luis Díaz ha ka minit kaba 80.
Hashwa ban kut artad ka jingïalehkai, u rangïa-lehkai ka Stuttgart u Angelo Stiller u la kum pyndei ïa ka bol hapoh ‘box’ ha kaba kane ka la ailad biang ïa u Kane ba un khur ïa ka hat-trick lyngba ka penalty. Te kumta une u rangïalehkai sha-khmat u la lah ban thep haduh 61 kol ha baroh ki lympung ïalehkai na ka bynta kane ka klob, kynthup ha ka Bundesliga, German Cup, Champions League bad ka Super Cup.
Kane ka jingjop ka la pynlong ïa ka Bayern ba kan rah ha ka sien kaba nyngkong eh naduh ba ka la ïashim bynta nyngkong ha u 2000.
