Shillong, Jymmang 24
Ka kynhun ki nongïakhun kti ka Jylla hapoh ka lama jong ka Meghalaya Arm Wrestling Association (MAWA) ki la mih na ka nongbah ban leit shim bynta ha ka 4th PAFI National Arm Wrestling & Para Arm Wrestling Championship ka ban long ha Ahmadabad, Gujarat naduh ka 29 tarik mynta u bnai haduh ka 1 tarik u Jylliew.
Hashwa ba kin mih noh na ka nongbah, la pynlong da ka jingïalang ai khublei kitbok bad ban ai mynsiem da u President ka Synjuk u Bah Junestar Kharbuli ha ryngkat ka jingdonlang ki nongïalam jong ka MAWA bad ki nongïalehkai.
U Bah June u la ïathuh ba kane ka dei ka sien kaba nyngkong eh ba ïa ka World Championship mynta u snem yn pynlong ha India, bad na ka liang ka MAWA ka la pynkhreh ha baroh ki kyrdan kiba kynthup ïa ka Junior, Sub Junior, Senior, Master, Grandmaster bad Para-Athletes.
U la ïathuh ba ki la don haduh 104 ngut ki rang bad ki thei ïalehkai kiba kynthup ïa 50 ngut ki shynrang bad 54 ngut ki kynthei ki ban leit shij bynta sha katei ka lympung ha kaba la synran lang ïa ki da ki rephri bad ki dkhot kane ka synjuk.
Une u President u la ïathuh ba ki district, ki klob bad ki gym bapher bapher ki la wan lang ha kajuh ka lama jong ka MAWA ban mihkhmat ïa ka Jylla. U la ong ba ka MAWA ka sngewskhem ba kine ki rang bad ki thei ïalehkai kin wanrah nam ïa ka Jylla baroh kawei.
U la pynpaw ïa ka jing -kmen ba mynta ka kynti la ïoh ban phah haduh 104 ngut ki nongïalehkai sha katei ka rynsan kaba heh. Te kumta u la khmih lynti ba kine ki nongïalehkai kin poi sha ka World Championship.
Na ka liang ki nongpynïaid ki la jied ïa ki kapten ha la ki jong ki kyrdan bapher bapher kiba kynthup ïa u Kishore Chettri, Alan Sun Marba-niang, Thranghok Dkhar, Roy Mylliem Umlong, Margareth Pathaw, Aibok -lin Rina, Bandarika Khar-kongor, Airikmenlang Sha -bong, Banshanlang Terang -para, Shanborlang Siang-shai- para bad Suzie Kharnarbi- para.
