Shillong, Jymmang 24
Wat hadien ba la hap ban ïalehkai sa tang 10 ngut ki rangïalehkai ha ka kylla miet, pynban ka Langsning FC ka la lah ban pynthikna ban jam sha ka semi final na ka Group-B ha ka 5th Meghalaya State League, hadien ba la pynliem noh ïa ka Rymbai Shkenshynriah SC da 4-2 kol ha ka jingïakhun quarter final league ha ka sngi Saitjaiñ.
U Atlanson Kharmaw (32′), Samuel Phawa (41′), Dajiedlang Wanshnong (70′) bad Mecheal Roy Kurbah (90’+2) ki long ki rangïalehkai kiba la ïoh ban pynkhih jar na ka bynta ka Langsning FC, katba u Ïaishah Bareh (48′) bad Harita Suchen (90’+5) ki long ki arngut kiba la thep na ka bynta ka Shkenshynriah.
Ha ka kylla miet kane ka kynhun ïalehkai kaba na East Jaiñtia kam shim la lah ba kan pyndonkam ïa ki kabu ksiar kiba ka la ïoh, hynrei ka Langsning FC ka la lah ban jam shakhmat ha kane ka jingïakhun.
Hashwa jong kane, ka Nangkiew Irat FC ka la ïai don ïalade ha ka thong ban buh jaka lem sha ka semi final, hadien ba ka la pynliem noh ïa ka Maram FC da 3-2 kol. Kane ka la wan urlong lyngba ki ar kol ba la thep da u Justerwell Tham (28′, 59′) bad kawei pat da u Neblejohn Lyngkhoi (82′), katba ïa ka shi kol jong ka Maram FC la thep ia ka Threesbirth Momin (86′).
Haba phai pat sha ka miej ïakheiñ poiñ, ka Langsning FC ka la kamai 12 point bad bynrap sa ka Nangkiew bad Shkenshynriah kiba la ïoh mar 9 poiñ. Hynrei ka rai ban ïoh rung sha ka semi final kan shong ha ka jingïalehkai ba khatduh jong ki ka ban long ha ka sngi Ba-ar.
Ha ka lah sngi U Blei kan dei ka jingïakhun ba khatduh na ka bynta ka Group-A bad ha ka por 2 baje nohphai sngi ka Rangdajied United FC kan ïakhun pyrshah ïa ka Shillong Lajong FC bad ha ka por 6 baje janmiet ka Mawlai SC kan ïakhun pyrshah ïa ka Nongkseh SSCC.
Na kane ka group ka Nongkseh bad Lajong ki la buh jaka ïalade sha ka semi final, hynrei lyngba kine ki jingïakhun yn sa lah ba kan batai shai mano napdeng kine ki ban ïoh bat ïa ka kyrdan ba nyngkong bad kaba ar.
