Shillong, Jymmang 24
Ka Meghalaya Basketball Association (MBA) ka la pynthymmai ïa ki nongkitkam na ka bynta ka samoi treikam kaba saw snem (2026-2030) ha kaba ïa ka kam President la pynkhamti ha u Myntri ka tnat ïalehkai u Bah Wailadmiki Shylla bad ka kam General Secretary ka leit sha u Bah James M. Bamon.
Kane ka la wan hadien ba la pynlong ïa ka ilekshon kaba la long ha Raid Laban College ha kaba la pynïaid da u Returning Officer u Bah S. Kharsyiem-lieh (Retd Judge KHADC Court) ha ka jingsakhi lang u nongpeit pyrman na ka Basketball Federation of India u Sajid Rahman, kumjuhu Bah Damang Syngkon na ka tnat ïalehkai jong ka Sorkar Jylla bad u Bah John F Kharshi-ing, Working President ka Meghalaya State Olympic Associa-tion.
Kat kum ka kyrwoh la ong ba ïa kane ka ilekshon ka la lah ban pynïaid ha ka rukom kaba khuid ba suba kiba long kat kum ka National Sports Development Code jong ka ri India.
Ïa ka kam Working President la pynkhamti ha u Bah Carnes Sohshang bad Henry S Marak, la thung saw ngut na ka bynta ka kam Vice President kata u Bah Joel Marbaniang, Wanlambok Ïawphniaw, Bah James R Lyngwa bad Kong Naphi-shisha Marweiñ. Ka kam Joint Secretary ka leit sha u Bah Banskhlemlang Wahlang bad ka Jessica T Sangma, Treasurer sha u Bah Andy L Basaïaw-moit. La thung ruh san ngut ki Executive Member kata u Bah Teilang Pde, Johnny Lee Lamare, Kong Ashaliaya Wahlang, Judah Wayne G Momin bad Abhyan Changgu G Momin.
Na ka liang ka MBA ka la pynpaw ka jingai khublei ïa baroh ki dkhot jong ki unit kiba la pynïasoh sha kane ka synjuk, ki nongmihkhmat na ki synjuk bapher bapher kiba la wan sha kane ka jingïalang na ka bynta ban pynïaid beit ïaid ryntih ïa ka ilekshon kaba jop.
