Imphal, Jymmang:
Ki bor pahara ki la pynlong ïa ki jingkhynra kiba bun ha kylleng ka Manipur ha ka 22 bad 23 tarik u Jymmang, kaba la pynlong ïa ki ban kem ïa san ngut ki lehnoh kiba dei na ki kynhun bapher bapher ba la shah ñiew beaiñ bad ïoh ruh ban kurup ïa shibun ki tiar ïasiat, ki bom pynbthei bad kiwei pat ki tiar pyndonkam.
Ha kawei ka jingkhynra kaba la pynlong ha ka 23 tarik, Jymmang, ki bor pahara ki la kem ïa arngut ki dkhot ba trei shitom jong ka Manipur Revolutionary Army (MRA) na surok Wangkhei Ayangpalli ha Imphal. Kine ki briew kiba la shah kem ki dei kiba la tip kyrteng kum u Ningthoujam Vicky Singh ba la tip ruh da ka kyrteng kum u Munal (30) uba shong ba sah ha Kongba Nandeibam Leikai kaba don ha Imphal East district bad u Ningthoujam Ishworchandra Singh ba la tip ruh da ka kyrteng kum u Loiya bad kum u Thawailakpa (24, uba dei na Laphupat Tera Mayai Leikaistriding ha Imphal West bad uba long u nongshong shnong ba mynta jong ka Langjing Makha Leikai.
Ki bor pahara ki la ïoh ban kurup lai tylli ki mobile phone, kawei ka Aadhaar card bad kawei ka kali ar shaka.
Ha kawei pat ka jingkhynra ha kane ka juh ka sngi, ki bor pahara ki la ïoh ban kem ïa u Jehovah Raja Dutta (24) uba dei u nongshong shnong jong ka shnong Edenthar Rengkai kaba hap hapoh jong ka Churachandpur Police Station na ka jaka sah jong u kaba don ha Churachandpur distrik.
Ha kane ka jingkhynra, ki bor pahara ki la kurup kawei ka suloi INSAS ryngkat saw tylli ki magazine, 36 tylli ki song kuli jong ka 5.56 mm ki bym pat pyndonkam, kawei ka camouflage bulletproof vest bad kawei ka mobile phone.
Hashwa kane, ha ka 22 tarik u Jymmang, ki bor pahara ki la kem ïa arngut ki dkhot ba treikam jong ka United Kuki National Army (UKNA) na ka thaiñ Nghathal kaba hap hapoh jong ka Churachandpur Police Station ha Churachandpur District. Kitei ki briew kiba la shah kem ki dei kiba la tip kyrteng kum u Thongpi Guite (33) bad u Shokhomang Baite (40).
Ki tiar kiba la ïoh kurup na kitei ki kynthup ïa kawei ka suloi AK-47 kaba don ka Magazine, kawei ka Pistol 9 mm kaba don ka Magazine, 31 tylli song ki kuli ki bym pat pyndonkam jong ki tiar siat bapher bapher, ar tylli ki bom kawang kti bad ar tylli ki mobile phone.
Ki bor pahara ki dang bteng ïa ka jingtohkit halor kine ki jingjia.
