Shillong, Jymmang 25
U Manager ka Spain u la pynthikna ïa ka thup ki 26 ngut ki rangïalehkai na ka bynta ka FIFA World Cup 2026, ha kaba u khlur ïalehkai ba dangkhynnah u Lamine Yamal un ïalam ïa kane ka kynhun bad kan dei ka sien kaba nyngkong eh ba ym shym la shah kynthup ki rangïalehkai na ka Real Madrid C.F.
Ka Spain ka la rung sha kane ka lympung napdeng ki ri kiba paw hadien ba ka la jop ïa ka UEFA Euro 2024 bad ka la jingshah rem noh ha ka pre-quarter final jong ka World Cup 2022 ha Qatar.
Ïa kane ka kynhun u De la Fuente u la pynbna ha ka lah sngi U Blei ha Madrid, ha kaba ka Spain kan sdang ïa ka jingïalehkai kaba nyngkong ha ka World Cup pyrshah ïa ka Cape Verde ha ka 15 tarik u Jylliew hashwa ba kan ïakynduh pyrshah ïa ka Saudi Arabia ha ka 21 tarik vad ïa ka Uruguay ha ka 26 tarik ha ka Group-H.
Kawei kaba ki la sdang ban ïakren bha ha Spain ka la long ka jingbym shah jied ki rangïalehkai ka Real Madrid ban mihkhmat ïa kane ka kynhun. U Dani Carvajal bad u Dean Huijsen kim shym la shah kynthup bad kane ka long ka sien kaba nyngkong eh ba ym shym la kynthup lang ïa ki rangïalehkai ka Real Madrid ban mihkhmat ïa ka Spain ha ka World Cup.
Kumba ka paw u Huijsen bad u Carvajal kim shym la rung hapoh ka thup ki 55 ngut ki rangïalehkai hashwa ban sdang kane ka lympung.
U De la Fuente u la kyntait ba ka jingïadei bad ka klob kam don bynta ei ei ha ki rai jong u ha ka jingïakren bad ki nongthoh khubor ha ka lah sngi U Blei. “Ngam ju peit ïa kawei ka klob ne kawei pat. Ngam don kata ka jingsngewïapher.”
“Ha nga ka long kaba kongsan ban kynthup lang ïa baroh na ka bynta kane ka lympung,” la bynrap utei u manager ka Spain.
“Tang kawei kaba nga kwah ka long ba kine ki nongïalehkai phutbol kin sngew sarong ban mihkhmat ïa ka kynhun ïalehkai ka ri.”
Kane ka jingbym don ki ban mihkhmat na ka Real Madrid ka long hadien ba kane ka klob kam shym la lah ban pynpaw ïa ka jingtbit ha ka lympung ïalehkai hapoh ka ri, ha kaba ka la duna haduh 8 poiñ ïa ka FC Barcelona, kaba long ka lahduh ha ka La Liga bad ka la pynkut ïa kane ka samoi ïalehkai khlem da lah ban rah ïa ka trophy.
Wat hapdeng ka jingmynsaw, pynban u Yamal un ïalam ïa kane ka kynhun. Kane kan long kaba sien kaba nyngkong eh ïa u ban paw ha ka FIFA World Cup hadien ba u la long kum uwei na ki khlur ïalehkai ba kynsai ha ki ar snem ba la lah. U la ïoh ban mihkhmat ïa ka Spain ha ka sien kaba nyngkong eh ha u Nailur jong u snem 2023 ha ka rta kaba dang 16 snem bad 57 sngi, ban long uba dangkhynnah ban mihkhmat ïa katei ka kynhun ïalehkai senior.
Kumba ka paw u Yamal u la long ruh u rangïalehkai ba kongsan na ka bynta ka Spain ban khur jingjop ha ka UEFA Euro 2024 bad ban khur ruh ïa ka khusnam kum u rangïalehkai ba dangkhynnah tam ha kane ka lympung.
Ki la don katto katne ki jingsngew-khia halor ka jingkoit jingkhiah jong u Yamal, u Nico Williams bad u Mikel Merino na ka bynta kane ka lympung, hynrei u De la Fuente u la kyntait ïa ka jingsngewtieng halor ka jingdon jong ki. “Ngi la sngew shngaiñ bha,” u la ong.
“Nga sngew ban ong ba lada ym don ki jingmynsaw, ngi lah ban long kiba la khreh naduh ka jingïalehkai kaba nyngkong. U doktor bad u nonghikai ki la leit jngoh ïa ki klob bad ïakren bha bad ki. Ngi la ïatreilang bad ki.”
Te kumta ka Spain kan pynkhreh shwa da ki jingïalehkai hashwa ba kan ïakhun ha ka World Cup. Kan ïakhun nyngkong pyrshah ïaka Iraq ha A Coruña ha ka 4 tarik u Jylliew hashwa ba kan leit ïakhun pyrshah ïa ka Peru ha Puebla, Mexico ha ka 8 tarik.
