Kohima, Jymmang:
U DC ka Kohima u B. Henok Buchem ha ki khyndiat sngi jong ka taïew ba la lah u la pynkynmaw ïa baroh ki shnong kiba don hapoh Kohima distrik jong ka Nagaland halor ka jingkhang syndon ïa ki plastik ba pyndonkam tang shisien.
Ha ka jingthoh ba la pynmih katkum ka jingpynbna jong ka tnad ki kam pohïing (GAB-I) kaba la pynmih ha ka 18 tarik u Jymmang, 2026, ki jingbthah jong ka Supreme Court ha ka 14 tarik u Rymphang, 2026, bad ki kyndon jong ka Plastic Waste Management (Amendment) Rules, 2021, la pynmih da u Buchem ba la pynkynmaw biang ïa ka jingthoh bahashwa ba la pynmih da ka State Urban Development Department halor ka jingkhang.
Ha kaba ïadei bad kane, la bthah ïa baroh ki shnong kiba hap hapoh ka Kohima distrik ba kin bud pyrkhing bha ïa ki kyndon khang ïa ki tiar plastik bapher bapher kiba ju pyndonkam tang shisien pyndonkam.
Ki tiar ba la khang ki kynthup ïa baroh ki pla plastik ki ba don ne khlem don jingrah, khlem da kheiñ ïa ka jingrben ne ka jingheh jingrit; ki tiar bam kiba dei da ki plastik kum ki pliang, ki khuri, ki proh, ki shamoit, bad ki jingtan umsoh ne jingdih; ki tiar pynitynnad da ka styrofoam (thermocol); bad ki tiar ba la shna da ka polythene, nylon, polivinyl kloraid (PVC), polipropilene, bad polistyrene.
Ka jingpynbna ka pynkynmaw biang ruh ïa ka jingkhang ban pyndonkam ïa ki flex banner, ki board, bad ki poster da ki tnad, ki jaka treikam, bad ki tnad sorkar ha ki por ba don ki jingïalang bad ki prokram, kumba la pynbna da ka Urban Development Department ha u Nohprah, 2020.
Shuh shuh, ka hukum ka pynpaw ïa ka jingkhang ïa ki tiar kum ki jingkhlong shkor kiba don ki dieng plastik, ki jingteh ïa ki balloon, ki lama plastik, ki jingbat mit mit, ice-cream, ki tiar pynitynnad da ka thermocol, ki pla plastik, ki jingsop ïa ki synduk mit mit, ki Invitation Card bad ki song sikret, ki PVC banner kiba duna ïa ka 100 microns, bad ki jingking ba la shna da ki plastik.
Nalor kata, ka jingpynbna ka pynskhem biang ïa ka jingkhang lut ïa ki bilor um dih ba la song hapoh 20 litar ka jingthew na ka bynta ki jingïalang, ki seminar, ki jingïalang, bad ka jingdih um shimet.
