Imphal, Jymmang:
Ki shipai pahara ba ïatreilang kiba kynthup ïa ki pulit ka Manipur, Central Reserve Police Force (CRPF) bad ki Assam Rifles ki la ïoh kem ïa saw ngut ki briew ha Kangpokpi distrik ha ka lah sngi U Blei, ha ka jingkhynra kaba ïadei bad ka jingtohkit halor ka jingshah rahbor jong ki 6 ngut.
Ïa kane ka jingkhynra la pynlong ha ka jaka hapdeng u P. Moulding bad ka surok hapdeng shnong Leilon Vaiphei kum shi bynta jong ka jingkhynra kaba la sdang hadien ka jingshah rahbor jong ki 6 ngut ki briew na Leilon Vaiphei ha ka 13 tarik Jymmang, 2026.
Kine ki briew kiba la shah kem ki dei kiba la tip kyrteng kum u Thangkhomang Khongsai (51) na ka shnong Patbung, Kangchup; u Seikholet Khongsai (40) na Mongbung Tongneh, New Keithelmanbi; U Lunminthang Dimngel (27) bad u Kamgoulal Khongsai (30).
Katkum ki tyllong khubor ba la wan na ki shipai, la ong ba kine ki saw ngut la suba ba ki dei ki nongtrei mon sngewbha ha ki kam shnong kiba don tiar ïaleh kiba treikam ha ka Elaka Kangpokpi. La suba ruh ba ki donkti ha ki kam pyrshah imlang sahlang, kynthup ïa ka jingdawa pisa, ka jingpyntieng pynsmiej, bad ka jingdon tiar ïaleh.
Ki heh sorkar ki la pynpaw ba ka jingdonkti jong ki briew kiba la shah kem ha ka jingshah rahbor jong ki hynriew ngut ka dang don ha ka jingtohkit bad yn sa pynthikna ha ka jingtohkit kaba bniah.
Ka jingtohkit kaba bniah halor kane ka kam ka dang ïaid shakhmat khnang ban ïohkem shuh shuh sa ïa kiwei pat.
