Shillong, Jymmang 26
Ka Sports Cell jong ka Hynñiewtrep Youths’ Council (HYC) ka la phah ïa ki jingujor sha ka Director General of Police (DGP), Meghalaya bad sha ka Board of Control for Cricket in India (BCCI), da kaba kyrpad ban tohkit mardor halor ki jingkynnoh shah leh khlem akor ki ‘thei ïalehkai kriket jong ka Jylla bad ruh halor ka bynta ba la kynnoh ïa katto katne ki nongkitkam barim jong ka Meghalaya Cricket Association (MCA).
Ka Seng ka pynpaw ba watla kane ka kam ka la poi sha ka miej jong ka Meghalaya State Women Commission (MSWC), hynrei namar ka jingsngewkhia jong kine ki jingkynnoh pyrshah ïa kiba don ha ka bor, namar kata la dawa ïa ka jingshim kam mardor, kaba hok bad kaba laitluid na ka liang ki bor ka aiñ bad ki bor ba dei peit ha ka kam ïalehkai kriket ha Ri India.
Ha ka jingujor sha ka DGP, ka Seng ka la dawa ïa ka jingtohkit ba mardor , ka jingngat mukotduma ïa ka jingujor FIR lada donkam katkum ka aiñ, ka jingshngaiñ bad ka jingïada ïa ki nongujor bad ki sakhi, bad ka jingpynshitom katkum ka aiñ ïa baroh kiba lap ba ki donkti ha kane ka kam be-aiñ.
Ha ka jingthoh sha ka BCCI, ka Seng ka la kyrpad ïa kane ka synjuk ïalehkai kriket jong ka ri ba kan sdang ïa ka jingtohkit kaba laitluid, ban bishar bniah ïa ka jingbakla jong ki nongkitkam kiba don bynta ha ka MCA, ban pynthikna ïa ka jingïada ïa ki nongïalehkai kiba shah ktah, bad ban pynkhlaiñ ïa ki rukom pynïaid bad ka jingpynbeit ïa ki jingujor hapoh ki bor ba dei khmih ïa ka kriket ha ka Jylla.
Shuh shuh ka Seng ka la ban jur ba ka jingshngaiñ, ka burom ka ijot bad ka bha ka miat jong ki ‘thei ïalehkai kam lah ban shah pynkheiñ, bad ka la ong ruh ba kano kano ka jingpyrshang ban tap eitmiaw ïa ki jingujor lane ban ïada ïa kiba briew ba don ha ka bor, kan pyntlot ïa ka jingshaniah u paidbah bad kan pynrit mynsiem ruh ïa kiba shah ktah ban wad ïa ka jingbishar kaba hok.
Ha kaba kut ka HYC ka la kyrpad ïa ki bor ba dei khmih ïa kane ka kam, ba ki dei ban leh mardor, da ka jingkhuid bad ka jingbishar hok khnang ban pynïoh ïa ka bishar kaba hok bad ban ïada ïa ka jinglong khuid jong ki tnat treikam kiba khmih ïa ki kam ïalehkai ha ka Jylla hi baroh kawei.
