Shillong, Jymmang 27
Ka Phir Kurbah MSS&CC bad ka Mawpdang SC ki la khur jingjop ha ka lympung ïalehkai U-20 4th Division Football League 2026 ba la pynïaid da ka Shillong Sports Association (SSA) ha ka sngi Balang.
Ha kane ka jingïakhun kaba la long ha SSA Stadium kaba ha Polo, ka Phir Kurbah ka la pynliem noh ïa ka Riatsamthiah SC da 1-0 kol bad ïa kane la thep da u Neban Janong ha ka minit kaba 75.
Kumjuh ha ka jingïakhun kaba ar, ka Mawpdang ka la pynliem noh ïa ka Don Bosco Academy da 2-1 kol.
Ha kane ka jingïakhun ka Don Bosco Academy ka la pynkhih jar nyngkong eh lyngba u Hamebantei Ryntathiang ha ka minit kaba 25. Hynrei hadien shiteng kynta ka Mawpdang ka la lah ban pynphai kylla lyngba u Rafealnando Langstieh (32) na ka bynta ban ïakhaid mar shi kol. Kane ka kynhun ka la thep biang sa shi kol ha ka kylla miet lyngba u Marbiang Kharbhih ha ka minit kaba 79 na ka bynta ban khur syndon ïa ka jingjop.
Haba phai sha kawei pat ka jingïakhun kaba la long ha madan MFA kaba ha Third Ground, Polo hapdeng ka Them Rangshken SC bad ka Imson SC ki la ïasam mar shi poiñ hadien ba kim shym la lah ban thep kol haduh kaba kut ka jingïalehkai.
Kane ka lympung kan bteng biang ha ka sngi Palei, ha kaba ka Weilyngkut Area FCC kan ïakhun pyrshah ïa ka Mawlyngngad SC ha ka por 1 baje mynstep bad ka Madanrting SC ïa ka Golflink SC ha ka por 4 baje nohphai sngi. Kine baroh ar ki jingïalehkai yn pynlong ha SSA Stadium. Katba kawei pat ka jingïalehkai hapdeng ka Lumpyngngad SC pyrshah ïa ka Laitlulong SC yn pynlong ha ka por 4 baje nohphai sngi ha madan MFA.
