Shillong, Jymmang 27
Ka Manchester United ka la pynthikna ba ka la thung pura ïa u Michael Carrick kum u manager ba pura na ka bynta ka jingïateh kaba ar snem kynthih.
Une u manager uba la 44 snem ka rta u la shimti shipor hadien ba u Ruben Amorim u la shah weng noh ha u Kyllalyngkot bad u la lah ban pynurlong ban jam sha ka Champions League na ka bynta ka aïom ka ban wan.
U Carrick uba dei u manager barim ka Middlesbrough u la lah ban pynskhem ïa ka United ban don ha ka kyrdan balai ha ka Premier League hadien ba ka la lah ban pynliem ïa ka Nottingham Forest ha ka sngi U Blei.
Na ki 16 tylli ki jingïalehkai, u Carrick u la lah ban pynurlong ban jop 11 sien bad u la don hapoh ka thup jong ki hynriew ngut ki ban ïoh shimti kum u manager ha ka Premier League.
Ym don kano kano ka klob kaba don ha ka kyrdan ba ha khlieh duh kaba la ïoh tam bun ki poiñ ban ïa ki 36 poiñ kiba ka United ka la ïoh lum naduh ba la thung ïa u Carrick ha ka 13 tarik u Kyllalyngkot.
Hadien ba la ai jingmut da u Director of football kane ka klob u Jason Wilcox bad u Chief Executive u Omar Berrada, u Sir Jim Ratcliffe bad ka longïing longsem jong ka Glazer, ki la ai jingbit halor ka jingthung ïa u Carrick.
“Naduh ka khyllipmat ba nga la poi hangne 20 snem mynshwa, nga la sngew ïa ka jingleh phylla jong ka Manchester United. Ban kit ïa ka jingkitkhlieh ban ïalam ïa ka kynhun ïalehkai phutbol ka long kaba kham kyrpang bad ka jingsngew sarong kaba khraw,” la ong u Carrick.
“Naduh ki san bnai ba la lah nga shem ba kane ka kynhun jong ki rangïalehkai ka la lah ban wanphai da ka jingkhlaiñ bor lyngba ka jingïatreilang ha ryngkat ka jingkut jingmut kumba ngi angnud.”
Ka United ka la don hapdeng ka jingkulmar naduh ba shah weng noh u Amorim, hynrei hadien kane ka kynhun ka la sdang ban kiew ha ka rukom ïalehkai.
