Imphal, Jymmang:
Ki nongmihkhmat na ki jaitbynriew Naga bad Meitei/Meetei ha ka 26 tarik, Jymmang, ki la ïatreilang ban thaw ïa ka rynsan bathymmai kaba la ai kyrteng ka Native Peoples’ Committee Manipur (NPCM) da ka jingthmu ba la pynpaw ban ïada ïa ka hok, ka jinglong kyrpang, ka khyndew ka shyiap bad ka burom jong ki trai ri trai muluk jong ka Manipur.
Ïa kane ka komiti la thaw thikna ha ka jingïalang kaba la long ha kawei ka hotel ha Imphal.Ha kane ka jingïalang la thung ïa u Ashang Kasar kum u Convener jong kane ka kynhun ba dang shu thaw thymmai, katba ïa u Ph Deban bad ïa u Dr L Phaomei la jied kum ki Co-convener.
Ka jingïalang ka la rai ruh da kawei ka sur ba ki nongkitkam bad ki dkhot treikam jong ka NPCM kin ïoh ïa ka jingmihkhmat kaba mar katjuh na baroh ar ki jaitbynriew Meitei/Meetei bad Naga ban pynthikna ïa ka jinglong kaba ïadei bad ka jingkitkhlieh lang.
Haba kren hadien ba la thaw ïa ka komiti, u Ashang Kasar u la ong ba la thaw ïa kane ka kynhun ban ïada ïa ka hok, ka burom, ka khyndew ka shyiap bad ka jinglong trai ri trai muluk bad ban pynthikna ïa ka lawei jong ki pateng ban wan.
Ka jingïalang ka la rai shuh shuh ban pynlong ïa ka jingïalang paidbah jong ki trai ri trai muluk jong ka Manipur ha ka 2 tarik u Jylliew, 2026, ha ka shnong Makhan. Napdeng ki rai jong ka, ka komiti ka la khot ban weng noh ïa ki shipai Assam Rifles na Manipur, ban weng noh ïa ka jingïateh Suspension of Operations (SoO) bad ki kynhun lehnoh Kuki, bad ban pyntreikam noh mardor ïa ka National Register of Citizens (NRC) ha kane ka jylla.
