Imphal, Jymmang:
Ki bahaïing hasem jong ki 14 ngut ki nongshong shnong ba shah rahbor na ka shnong Taphou Kuki ha Kangpokpi distrik jong ka Manipur, ki la pynjur ïa ka jingïakhih jong ki, da kaba dawa ban tuklar mardor na baroh ar ki sorkar, kata ka sorkar pdeng bad ka sorkar jylla ban pynthikna ïa ka jingpyllait khlem jingeh ïa ki bahaïing hasem jong ki kiba la sah kum ki nongshah rahbor naduh ka 13 tarik u Jymmang.
Ka jingïakhih kaba dang ïaid shakhmat, kaba la bteng la katto katne sngi lynter, ka la khring ïa ka jingïashim bynta na ki spah ngut ki nongshong shnong, kynthup ïa ki kynthei, ki nongshong shnong kiba la tymmen, bad ki khynnah rit. Ki nongïakhih ki la pynpaw ba ka jingïakhih kan dang bteng khlem kut tad haduh ba baroh kiba shah rahbor kin shah pyllait suk.
Ka jingsngewsih bad ka jingkhuslai kaba nang jur ka la don ha ka jaka ïakhih katba ki bahaïing hasem ki la kynnoh ïa ki bor synshar ba kim shym la lah ban leh ei ei ïa ka jingeh kaba la slem bha. Ki nongshong shnong ki la kynnoh ba baroh ar tylli ki bor synshar jong ka Kangpokpi bad Senapati ki la kiar na ka jingkitkhlieh namar ki jingeh ha ka liang ka aiñ kiba don sawdong jong ka jaka ba jia katei ka jingshah rahbor.
