Shillong, Jymmang 28
Ka Nongkseh SS&CC bad ka Rymbai Shkenshynriah SC kin pynkhreh ban ïaknieh rung sha ka final jong ka 5th Meghalaya State League 2026, ha kaba kine ki kynhun kin ïakhun ïa ka semi final ha ka sngi Thohdieng ha SSA Stadium, Polo ha ka por 6 baje janmiet.
Ka Nongkseh ka dei ka kynhun kaba la wan nyngkong na Group-A ha ka jingïakhun ïa ka quarter final league, katba ka Shkenshynriah ka la wan ha ka kyrdan ba-ar na ka Group-B.
Ka Shkenshynriah ka dei ka kynhun kaba la ïoh rung teng sha ka semi-final ha ka MSL 4, hynrei ka la shah rem noh ha ka Shillong Lajong FC lyngba ka tie-breaker. Ki rangïalehkai kiba kham paw jong kane ka kynhun kaba na East Jaiñtia Hills ki long u Skilful Tariang, Hesmiki Rymbai, Niwan-o Bareh bad u Jeremy Nongtdu.
Ka Shkenshynriah ka dei ruh kawei na ki kynhun kaba nabar ka nongbah Shillong kaba la rung sha ka semi final jong kane ka lympung.
Ka jingïakhun pyrshah jong ka Shkenshynriah ïa ka Langsning, ka la pynlong ïa ka ban ïoh bun bha ki buit ïalehkai.
Katba ka Nongkseh ka don ïa ki rangïalehkai kiba paw kum u Hardy Cliff Nongbri, Shano Tariang, Sheen Sohktung, Chesterpaul Lyngdoh bad u Meban Wahlang kiba pyn -long ïa kane ka kynhun ban don jingkyrmen ba kan jop ïa ka Shkenshyn-riah.
Ïa kane ka lympung ba la kyrshan lang da ka tnat ïalehkai jong ka Sorkar Jylla, ki bor pynïaid ka Meghalaya Football Association, ki la pynbna ban die ïa ki tiket na ka bynta ki paidbah riewieit phutbol bad ka la kyntu ruh ïa ki nongkyrshan ba kin ym rah bitor, ki tiar pynmynsaw bad kiwei kiwei ki tiar be-aiñ. La mana tyngeh ruh ban ym dih duma bad ka kiad ha ki jaka shong jong ki.
