Shillong, Jymmang 28
Ka Myntri khynnah jong ka Sorkar Pdeng ba dei khmih ïa ka tnat ïalehkai ka Raksha Nikhil Khadse ka la pynbna halor ka jingthmu ban wanrah ïa ka High-Altitude Training Centre hapoh ka shlem ai jinghikai jong ka Sports Authority of India (SAI) Training Centre kaba don ha NEHU, Shillong.
Kane ka skhim kan hap hapoh ka Khelo India Mission jong ka Sorkar Pdeng namar ka jinglong jingman jong ka mariang kaba pyngngad ha kane ka jaka bad ka long kaba biang eh na ka bynta ki nongïalehkai kiba pynkhreh ban leit shim bynta shabar ri.
Ha kane ka jingwan jong ka kaba shi taiew sha ka jylla Meghalaya, ka Raksha ka la ïakynduh bad ïakren markhmat ïa manla iwei pa iwei na ki khynnah ha la ki jong ki jait jingïalehkai kiba don hapoh katei ka shlem ai jinghikai kiba kynthup naduh ka Karate, Boxing, Judo Sepaktakraw, Athletics, Football bad Archery. Ka la ïoh ban ïakren ruh bad u Assistant Director ka SAI Training Centre u R.K Mishra lem bad ki coach ha ka jingdon lang u Working President ka MSOA u Bah John F. Kharshiing. Ka la jurip ruh ïa ki jaka ïalehkai bad ki tiar ïalehkai kiba don hapoh katei ka shlem ai jinghikai naduh ka Gym, ki madan ïalehkai bad kiwei kiwei.
Kane ka MP kaba dang 39 snem ka rta, ka la ïashim bynta ruh da ka jingsngewkmen ha ka jingïalehkai phutbol bad siatkhnam ha ka jingwan jngoh ïa ka shlem ai jinghikai, ryngkat ki heh ophisar kiba la wan lang bad ka na Delhi.
Haba ïakren bad ki lad pathai khubor, ka Khadse ka la ong kane ka shlem ai jinghikai ka long kaba kongsan na ka bynta ban ai jinghikai ïa ki khynnah jong ka thaiñ shatei lammihngi kiba don ïa ki sap ba kyrpang ha la ki jong ki jingïalehkai bad na ka liang ka Sorkar Pdeng ka ïaleh ban pynbiang ïa ki jaka ïalehkai ha kane ka thaiñ.
Shuh shuh ka la ïaroh ruh ïa ka jinglong ka mariang ha kane ka jaka namar ka long kaba biang eh ban wanrah ïa ki prokram kilanmet ne ki coaching camp. Ka la ai ruh ka jingïaroh halor ka jingpynkhreh ka Sorkar Meghalaya na ka bynta ban pynlong ïa ka 39th National Games ha u snem 2027 bad ka la pynpaw ïa ka jingkhmih lynti ba kane ka Jylla kan lah ban pynmih shuh shuh ki khynnah kiba don sap ha ki jingïalehkai ha ki snem ki ban wan.
