Shillong, Jymmang 29
Ka Myntri Sorkar Pdeng ba dei peit ïa ka tnad Youth Affairs & Sports, ka Raksha Khadse, ka la pynïaid ïa ka jingïalang bishar bniah kaba hakhlieh duh hangne ha Jylla ban bishar bad pynkhlaiñ ïa ki jingtei ha ka kam ïalehkai bad ki jingthmu ban kyntiew ïa ki samla ha ka Jylla Meghalaya.
Ha kane ka jingïalang, la ïashim bynta da u Myntri ka tnad ïalehkai jong ka Jylla, Wailadmiki Shylla, u Commissioner & Secretary Dr. Vijay Kumar D, bad ki seng treikam bapher-bapher jong ka kam ïalehkai, kiba pynleit jingmut ha kaba kyntiew ïa ka sap jong ki nongshong shnong, ban kyntiew ïa ka jingïadei jong ki samla, bad ban pynroi ïa ka jingïatreilang kaba jan hapdeng ka Ri hi baroh kawei bad ka Jylla.
Ka Sorkar Meghalaya ka la pynpaw ba jan 900 ngut ki nongïalehkai ki dang ïoh jingïarap pisa mynta na ka skhim State Sports Scholarship.
Ki jingïakren ki la pynpaw ïa ka “Chief Minister’s Football Mission” jong ka Meghalaya ka dei ka jingthmu ban kyntiew ïa ki jingïalehkai ha ki riewlum ba la ïalam da u Myntri Rangbah ka Jylla u Conrad K. Sangma ban pynlong ïa ka nongbah Shillong bad ïa ka Jylla kum ka “Nongbah ïalehkai phutbol jong ka ri India”. Da ka jingpynshlur na ki rukom ïalehkai jong ka ri America ba shathie, kane ka jingthmu ba pawnam ka treikam lyngba ki 125 tylli ki jaka ïalehkai grassroots centres, ka kyrshan ïa kumba 10,000 ngut ki nongïalehkai, bad ka la dep wanrah ïa ki katto katne ki nongïalehkai nabar ri.
Ka Myntri ka Sorkar Pdeng ka la bishar bniah ïa ka jingïaid shaphrang ha ki projek ba kongsan jong ka Jylla, kynthup ïa ka Mawkhanu Football Stadium: La thmu kum kawei na ki madan ïalehkai ba heh tam ha ka thaiñ bad ka jaka kaba lah ban pynlong ïa ka jingïalang plie ïa ka National Games, kynthup ruh ka Umsawli Sports Complex, bad ka jaka ïalehkai Umtham slalom: Ka mih kum kawei na ki jaka ïalehkai ha ki kam jngi um ba pawnam tam jong ka ri India.
Ka jingbishar bniah ka kynthup ïa ka skhim pynïasoh bad pynkupbor ïa ki samla na ka bynta ki samla pule (YESS Meghalaya), kaba bei tyngka ïa ki klob kiba pynleit jingmut ha ki samla. Nalor kata, ki heh Sorkar ki la ïakren ban pyndonkam ïa ka portal MY Bharat ban wad ïa ki nongtrei mon sngewbha na ka bynta ki jingïalehkai kiba kongsan ki ban sa wan kum ki National Games.
Ka Raksha Khadse ka la ban jur ïa ka jingdonkam ban pynïadei ïa ki jingtei jong ka Jylla bad ki rukom pynroi ïa ki nongïalehkai bad ban pynkhlain bad ba la pynskhem da ka Khelo India. Ki nongmihkhmat na ka Meghalaya State Olympic Association, ba kynthup ruh ïa ki ophisar na ka jingïalehkai siat suloi, ïalehkai athletics, badminton, bad karate, ki la noh synñiang ruh ha ka jingïakren halor ka jingthmu ba dang bteng shibun ha ki por ban wan.
Haba pynkynmaw biang ïa ka jingkitkhlieh jong ka Sorkar Pdeng ïa ka thaiñ Shatei Lam Mihngi, ka Khadse ka la ïaroh ïa ka jingkiew kaba khraw jong ka Meghalaya ha ka kam ïalehkai bad ka jinglong jingman jong ki samla. Ka la ban jur ba ka jingïatreilang hapdeng ka Ri, ka Jylla, bad ki sengbhalang ha ka thaiñ ka long kaba kongsan bha ban pynroi ïa ki sap bad ban tei ïa ka kolshor ïalehkai kaba khlaiñ ha India.
