Shillong, Jymmang 29
U Lionel Messi un long u kapten ka Argentina ha kane ka World Cup, la pynbna da u National Coach jong ka Argentina, u Lionel Scaloni, ha ka sngi Palei, ha ka por ba u dang pynbna ïa ka kynhun ïalehkai kaba don 26 ngut ki ‘rang ïalehkai. U Messi, uba don 38 snem ka rta, um shym la pynthikna mynshwa ba un ïalehkai. Hynrei une u nongjop ba 8 sien ka Ballon d’Or un sa ïalam biang ïa ka Argentina, saw snem hadien ba u la rah ïa ka nam lahduh ha Qatar. Nalor ka jingpynskhem ïa ka jingdon jong u Messi, ka jingpynbna jong ka sngi Palei ka la weng noh ïa u Franco Mastantuono ka Real Madrid na ka kynhun ïalehkai jong ka Argentina.
Ka World Cup kaba heh tam haduh mynta, kaba la pynlong lang da ka America, Canada bad Mexico, kan sdang ha ka 11 tarik u Jylliew bad ka jingïakhun kaba nyngkong jong ka Argentina kan long hadien san sngi ba sdang kane ka lympung pyrshah ïa ka Algeria ha Kansas City.
U Messi u la don hapdeng ka jingmynsaw ha kine ki sngi ba la dep, ha kaba ka kynhun jong u ka Inter Miami mynta ka taïew ka la ong ba ka jingsumar kala lap ba u don ka jingshitom ha ki shyieng ha ka liang ka diang ki dohksah ka kjat jong u.
Ka Major League Soccer club kam shym la ai kano-kano ka por kaba shai na ka bynta ban wanphai biang u Messi hadien ba u la mih kynsan-kynsan na ka jingjop jong ka Miami da 6-4 kol ïa ka Philadelphia.
Ka kynhun jong ka Argentina ka don sa tang 17 ngut na ki 26 ngut ki nongïalehkai kiba la pynjop ïa ka nam lahduh ha Qatar. Ka kynhun jong ka Argentina ha ka World Cup ka don ruh ïa ka Austria bad ka Jordan.
Ryngkat bad u Messi, la khmih lynti ruh ba u rangïalehkai ba shakhmat jong ka Portugal, u Cristiano Ronaldo bad u nongap kol jong ka Mexico, u Guillermo Ochoa, kin mih madan ha ka World Cup kaba hynriew jong ki ha kane ka aiom lyiur.
