Shillong, Jymmang 29
Ka nongïalehkai ba pawnam jong ka Tennis, ka Serena Williams, ka la pynkyndit da ka jingpynbna ba ka thmu ban wanphai biang sha ka jingïalehkai, ha u bnai ban wan, ha ka jingïalehkai jong ka Queen’s Club ha London.
La ïathuh ba ka Williams, ka dang wad ban rung sha ka jingïalehkai doubles, da kaba pyndonkam ïa ka wildcard. La khmih lynti ba kan ïatreilang bad ka nongïalehkai ba dang 19 snem ka rta na Canada, ka Victoria Mboko.
Kane ka lympung kan sdang ha ka 8 tarik u Jylliew, marsien kut ka French Open. Ka Williams ka la dep ban pynlut hynriew bnai biang ha ka jaka test drok kaba la pynbna paidbah, kaba la ailad ïa ka ban ïoh ban shim bynta ha ka jingïakhun.
Mynta kane ka nong ïalehkai kaba la don 44 snem ka rta, ka la kilan met bha ha Florida la bun bnai. Ka khlem pat ïalehkai ïa ka jingïalehkai ba tikna naduh ka US Open ha u bnai Nailur 2022.
Kiwei ki nongïalehkai tennis ki pynpaw ka jingsngewkmen namar ka khubor ba ka lah ban wanphai biang kane u nongjop 23 sien ha ka Grand Slam, ha kaba ka Naomi Osaka ka la ong “Nga pyrkhat ba kan wanrah ïa ki briew ban peit ïa ka jingïalehkai tennis, kaba ka ju leh… Kan long kaba sngewtynnad ban ïohi biang ïa ka ha madan.”
Na ka liang kawei pat ka nongïalehkai ka Madison Keys ka la pynpaw “Ka Serena Williams kaba ïalehkai tennis ka long kaba tbit shibun ha kane ka kam ïalehkai Tennis… Ka dei kaba khraw bad tbit tam ha ki por baroh, kumta kan long kaba phylla lada ka wan biang.”
