Shillong, Jymmang 31
Ka Paris Saint-Germain ka la bat biang ïa ka nam lahduh kaba ar sien lynter ha ka Champions League, hadien ba ka la lah ban pynliem noh ïa ka Arsenal lyngba ka tie-breaker da 4-3 kol ha ka jingïakhun final kaba la long ha ka miet jong ka sngi Saitjaiñ.
Kane ka jingïakhun final kaba la long ha Hungary ka la long kaba itynnad bad kaba ïakhaid bha ha ka rukom ïalehkai ha kaba ki la ïathep mar 1-1 kol haduh kaba kut ki 120 minit hadien ba la bteng ïa ka extra time.
Haba phai sha ka rukom ïalehkai PSG ka la long ka kynhun kaba kham khlaiñ bor ha kaba ka la ïoh bun tylli ki kabu ksiar. Hynrei ka Arsenal ka la bud ïa ki rukom ïalehkai ka kynhun jong u Luis Enrique.
Watla u Kai Havertz u la ïoh ban pynkhih jar nyngkong eh tang mar ïasdang ka jingïalehkai ha ka minit kaba 6, hynrei kane kam shym la lah ban pynurlong ïa kane ka lahduh jong ka Premier League hapoh ka jingïalam u Mikel Arteta ba kan kynjoh sha ka thong watla ka dangtam haduh kaba kut jong ka kylla step.
Hadien ba la bteng ïa ka kylla miet ka PSG kaba long ka lahduh ha ka Ligue 1, ka la ïoh ïa ka kabu kaba biang ban pynphai lyngba ka penalty ba la shut da u Ousmane Dembélé. Kane ka la wan hadien ba u Cristhian Mosquera u la pynur ïa u Khvicha Kvaratskhelia hapoh box bad u Dembélé um shym la pynlehnohei ïa kane ka kabu ksiar kaba u la ïoh ha ka minit kaba 64.
Lyngba kane ka jingïakhaid ka la pynlong ïa kine ki kynhun ban ïai bteng ha ka ban ïakhun tyngeh, hynrei haduh kaba kut jong ki 90 minit ym shym la don ba lah ban thep kol. Wat hadien ba la ailad ba kin ïakhun ïa ka extra time, kine ki kynhun kim shym la lah ban thep kol.
Ha ka jingïashut ïa ka tie-breaker ka PSG sa shisien pat ka la lah ban pynpaw ïa ka jingtbit ha ka rukom shut bol. Hynrei ka Arsenal ka la sdang ban khynñiuh ha ka rukom shut ha kaba u Eberechi Eze um shym la lah ban thep bad u Gabriel u la shut bad ka la leit dei na diengkol na ka bynta ban pynlong syndon ïa ka PSG ban khur ïa ka jingjop.
