Shillong, Jymmang 31
U Myntri ka Sorkar Pdeng ba dei khmih ïa ka tnat ïalehkai, u Dr. Mansukh Mandaviya ha ka sngi Saitjaiñ u la pynïaid ïa ka jingïalang ban khmih bniah halor ki jingpynkhreh ka jylla Meghalaya ban pynlong ïa ka 39th National Games ha u 2027.
Ha kane ka jingïalang la ïadon lang u Myntri Rangbah ka jylla, Conrad K. Sangma, ka Myntri Khynnah ka Sorkar Pdeng ba dei khmih ïa ka tnat ïalehkai ka Raksha Khadse, ka President ka Indian Olympic Association ka P.T Usha, u Myntri ba dei khmih ïa ka tnat ïalehkai ka jylla Bah Wailadmiki Shylla, ki ophisar ba dei khmih ïa ka tnat ïalehkai, lem bad ki nongmihkhmat na ki phra tylli ki synjuk ïalehkai ki jylla ka thaiñ shatei lammihngi bad kiwei kiwei.
Ha kane ka jingïalang, u Dr. Mandaviya u la ban jur ba katkum ka jingthmu jong u Myntri Rangbahduh ka ri u Narendra Modi, ka 39th National Games ka dei ban long ym tang kum ka jingïalehkai ba hakhlieh duh jong ka ri, hynrei kum ka rynsan ban pyni ïa ka pateng ha ka kolshor kaba riewspah, kaba ïar, bad ka jinglong kyrpang jong ka Meghalaya bad ka thaiñ shatei lammihngi baroh kawei sha ka ri bad ka pyrthei.
U la ban jur ïa ka jingdonkam ban pynthikna ïa ki jingdon jingem kiba katkum ka juk mynta ha kaba ïadei bad ka kam ïalehkai, ka jingpynïaid kaba ryntih, bad ka jingïashim bynta paidbah kaba ïar ban pynlong ïa ka lympung ïalehkai kum ka kam kaba kyrpang na ka bynta ki jingïalehkai jong ka ri India.
“Ka jingïaineh bad ka jingïar ka dei ka khubor jong ngi na ka bynta ka 39th National Games ha Meghalaya ha u snem 2027,” la ong u Dr. Mandaviya.
Haba peit ïa ka jingkiew ka jingïashim bynta na ki jylla bapher bapher na ka bynta ban pynlong ïa ki jingïalehkai, une u Myntri ka Sorkar Pdeng u la ong ba ka National Games ka dei ban pynleit jingmut ha ka jingithuh ïa ki sap bad ka jingwad ïa ki sap.
“Dei ruh ban pyndonkam ïa ka National Games kum ka lad ban pynsaphriang jingtip halor ka jingpyndonkam da ki dawai pynkhlaiñ bor. Dei ban pynsngewthuh ïa ki nongïalehkai shaphang ka jingktah jong ka jingpyndonkam ïa ki dawai pynkhlaiñ,” u la bynrap.
U Dr. Mandaviya ka la ong ba dei ban pyndonkam ïa ki nongtrei mon sngewbha jong ka MY Bharat ha ka National Games ha Meghalaya.
Une u Myntri u la peit bniah ruh ïa ka jingïaid shaphrang jong ka jingkyntiew ïa ki jingdon jingem ba ïadei bad ka kam ïalehkai ha kylleng ki jylla Ashtalakshmi (ka thaiñ shatei lammihngi).
Ha kane ka jingïalang, la ai ïa ka jingbatai kaba bniah hakhmat u Myntri halor ka jinglong jingman jong ki projek na ka bynta ki jingdon jingem ha ki kam ïalehkai, ka jingpynkhreh ïa ki jaka, bad ki jingpynkhreh baroh na ka bynta ka 39th National Games 2027, kynthup ïa ki por ban pyndep bad ki bynta ba kongsan kiba donkam ban pyrkhat bha.
Ha kane ka jingwan ka jong u kaba lai sngi sha kane ka nongbah, u Dr. Mandaviya u la plie paidbah ruh ïa ka Multipurpose Integrated Sports Indoor Hall kaba ha Polo. U Dr. Mandaviya u la pynbna ruh ba shen yn sa tei ïa ka High-Altitude Training Centre ha SAI Training Centre kaba ha NEHU ha ka jinglut kaba T.150 klur.
