Shillong, Jymmang 31
Kan dei ka sien kaba nyng -kong eh ba ka Langsning FC ka la lah ban pynthikna ban jam sha ka final ka 5th Meghalaya State League, hadien ba ka la lah ban pynliem noh ïa ka Shillong Lajong FC lyngba ka tie-breaker da 4-2 kol ha ka sngi Saitjaiñ ha SSA Stadium, Polo.
Kane ka jingïakhun semi final kaba ar ka la pynhun hi jrut ïa ki paidbah nongkyrshan jong baroh artylli ki kynhun, namar ba ki la ïohi ïa kawei na ki jingïakhun kaba kynsai ba la mih paw da ki rangïalehkai kiba tbit.
Ka Shillong Lajong ka la pynkhih jar nyngkong lyngba u Fridison Wan-ñiang (21′), kaba la wan na ka daw ka jingsted ka jong u kat haduh ba ki rangïalehkai ‘dien ka Langsning kim shym la lah ban teh lakam.
Watla ka la shah tam shi kol, hynrei ki rangïalehkai ka Langsning kim shim la duh mynsiem watla kane ka kynhun kam shym la ïoh ban sei madan ïa ki katto katne na ki rangïalehkai ba kynsai ki jong ka, namar ka jingshitom bad ruh na ka daw ka rai sospon.
Hashwa ban kut ka kylla step, ka Langsning ka la sdang skhem ha ka rukom ïalehkai da kaba la ïoh ban ñiom naphang bad khamtam leilei haba la bteng ïa ka kylla miet ha kaba ka Lajong ha kiba bun ki khep, ka la hap ban ïalehkai satang ha la ka jong ka kut hadien ba ka Langsning FC ka la ïalehkai bha.
Hashwa ban wai ka Langsning ka la lah ban pynphai kylla lyngba u Nelson Rymbai (80′) n aka bynta ban ïakhaid mar shi kol. Kane ka jingïakhaid ka la neh haduh kaba kut jong ka extra time. Te kumta haba la rai ban pynïashut ïa ka tie-breaker, ki rangïalehkai ka Langsning da ka jingtbit bad long kaba jai jai, ki la lah ban pynrung ïa saw tylli ki kol, katba ka Lajong ka la shah khanglad kawei ka kol ha u rangapkol ka Langsning u Nister Roy Suting, katba sa kawei pat ka dei n aka daw ka jingkyiuh u rangïalehkai da kaba u la shut shabar.
Namar ka jinglah ban ïalehkai bha, u Atlanson u la ïohpdiang ia ka khusnam Hello Meghalaya Man of the Match da ka song pisa kaba T. 10 hajar tyngka bad ka trophy ba la sam da u President ka MFA u Bah Hamletson Dohling.
Kumta kaba sah mynta ka long ban ap ïa ka jingïakhun final ha kaba ka Langsning FC kan ïakhun pyrshah ïa ka Nongkseh SSCC, ha ka 5 tarik u Jylliew.
