Shillong, Jylliew 01
U President bad Secretary ka Meghalaya Football Association (MFA) u Bah Hamletson Dohling lem bad u Bah Sunesh M Syiem ki la ai khublei ïa baroh ki 33 tylli ki kynhun kiba la ïashim bynta ha ka 5th Meghalaya State League 2026.
U Bah Hamletson haba ïakren bad ki nongthoh khubor, u la pynpaw ba la shem bad ïohi ïa ka jingkiew ka phutbol ha ka Jylla. U la ong ba ka MSL-5 ka dei kaba kham pher haba ïa nujor bad kiwei pat ki lympung ïalehkai. “Ha kane ka kynti kaba mynta ka MFA ka la leh janai bha, ha kaba ïa baroh ki kyndon bad jingbthah katkum ba la pruid dak da ka All India Football Federation.”
U Bah Hamletson u ong ba lehse uba bun balang um lah ban tip namar ha ki por ba mynshwa don bun ki kynhun ki khlem da bud ryntih ban pynrung kyrteng ïa ki rangïalehkai ha ka CRS, kaba mynta ka kynti baroh 33 tylli ki kynhun ki la pynrung ïa ki kyrteng jong ki rangïalehkai hapoh kane ka thup jong ka CRS.
Nalor kata u Bah Dohling u weng ruh ïa ka jinglynga bad pisa u paidbah ba balei ba ka MFA ka da hap ban da pynlong ïa ka first bad ka second leg ha kane ka lympung, bad ka jubab hi ka long ba la pynlong haduh arwat ne ar kylla kum shi bynta ban bud ïa ka kyndon kaba la bthah da ka AIFF ba ka lahduh kane ka MSL la kumno kumno ka dei ba kan ïoh haduh 15 tylli ki jingïalehkai hashwa ba kan pynkhreh ïakhun sha ka I-League 3.
U la pynpaw ïa ka jingsngew kmen haba ïadei bad ka jingbun u paidbah ban wan ban sakhi bad ai khublei ïa ka Shkenshynriah kaba la ïalehkai bha ban poi shaduh ka semi final ha ka MSL namar kam dei satia kaba suk.
Haba ïadei bad ka phainal jong kane ka lympung u Bah Sunesh u pynpaw ba kan long ha ka 5 tarik u Jylliew ha ka por 6 baje janmiet.
Ha ka juh ka por u Bah Hamletson bad Bah Sunesh ki sngew ban pynpaw ba ha kane ka sien kaba mynta, ka MSL 5 ka la sei shisha ïa kiba bun ki rangïalehkai kiba kynsai tad haduh ba kim lah ban poi pyrkhat ba haduh katne ki khynnah samla ki long kiba da tbit shisha ha ka jingïalehkai phutbol
Dei lyngba kane ka MSL-5, ba ka MFA ka la lah ruh ba kan jied kumba 78 ngut ban ai shuh shuh ïa ka jinghikai kaba long kum shi bynta ban sei madan ïa ka kynhun ka ban pynkhreh na ka bnynta ka 39th National Games ka ban long ha u snem ban wan ha kane ka Jylla.
