Shillong, Jylliew 01
Ka India ka la ïoh ban lamkhmat ha ka Group-B jong ka SAFF Women’s Championship 2026, hadien ba ka la lah ban pynliem noh ïa ka Bangladesh da 3-0 kol ha ka sngi U Blei ha Margao, Goa.
Ka ‘thei ïalehkai ka Jylla ka Sanfida Nongrum, kaba la duh ban mih madan ha ka jingïalehkai kaba nyngkong, ka la ïohpdiang ïa ka nam Player of the Match lyngba ka jingtbit jong ha ka rukom pynbuh bol ha ka bynta kaba shapdeng.
Watla ka India ka la jop da 11-0 kol ïa ka Maldives ha ka jingïalehkai kaba nyngkong kaba la long ha ka 25 tarik u Jymmang, ka Sanfida kam shym la ïoh mih madan, hynrei dei tang ka ‘thei apkol ka Jylla ka Ribansi Jamu kaba la ïoh mih madan ha ka minit kaba 78.
Kumba ka paw kane ka long ka jingjop kaba nyngkong eh ha ki hynñiew snem ba ka India ka la jop ïa ka Bangladesh hadien ba ka la shah rem ha ki ar tylli ki jingïalehkai kiba la long ha u snem 2022 bad 2024.
Ha katei ka jingïakhun ka India ka la pynkhih jar nyngkong lyngba ka Pyari Xaxa ha ka minit kaba 36. Kane ka kynhun ka la thep biang sa ar kol ha ka kylla miet lyngba ka penalty ba la shut da ka Lynda Kom Serto (78) bad ka Malavika P (90’+1) na ka bynta ban khur syndon ïa ka jingjop.
Lyngba ka jinglah ban kamai 6 poiñ na ki ar sien ïakhun, ka India ka la bat ïa ka kyrdan ba hakhlieh ha ka Group-B. Te kumta ka India kan pynkhreh ïa ka jingïakhun semi final pyrshah ïa ka Bhutan ha ka 3 tarik ha ka por 8 baje mynmiet. Ha kane kajuh hi ka sngi ka Bangladesh kan ïakynduh pyrshah ïa ka Nepal ha ka por 4 baje nohphai sngi.
