Shillong, Jylliew 01
Ka Sorkar Jylla ka la ong ba ka dangïai buddien bad peitngor bha ïa ki jingkynnoh halor ka jingshah ktah kti bad shah kren kynshleiñ ki kynthei ïalehkai kriket ha u coach bad manager.
Haba kren bad ki lad pathai khubor ha ka sngi Saitjaiñ, u Myntri ka tnat ïalehkai, u Bah Wailad -miki Shylla u la ong ba ka Sorkar Jylla kam ailad ïa kino kino ki jingjrong kti ne kren tohmet pyrshah ïa ki ‘thei ïalehkai bad u la pynthikna ba yn shim ïa ki sienjam kiba tyngeh lada lap ba ki jingkynnoh ki long kiba shisha.
Hynrei u Myntri u la ong ba ïa mynta kam pat dei ka por ba ka Sorkar kan tuklar halor kane ka bynta, namar ka jingtohkit ka dangïaid pyrshah ïa ki katto katne ki dkhot nongkitkam barim jong ka Meghalaya Criket Assosiation (MCA).
U Bah wailad u la ong ba ka sorkar kan ap shwa ïa ka kaiphod bad ki jinglap jong ka jingtohkit shwa ban shim ïa kano kano ka rai.
Lah ban kdew ba katei ka jingjia shah jrong kti bad shah kren kynshleiñ ki ‘thei ïalehkai ha la u jong u coach bad manager ka la jia ha kawei ka jingleit shim bynta ka kynhun ïalehkai U-23 shabar jylla ha u snem ba la lah.
La ong ba watla ki ‘thei ïalehkai ki la dep ban ujor sha ka MCA, hynrei kim shym la shim khia eiei. Te kumta katei ka kynhun ka la leit ujor syndon sha ka Meghalaya State Women Commission (MSWC), kaba la shim ka jingtohkit pyrshah ïa ki nongïalam barim katei ka synjuk bad haduh mynta ka jingtohkit ka dang-ïaid shaphrang na ka bynta ban lap ïa ki daw kiba shisha baroh.
