Imphal, Jylliew:
U Myntri Rangbah jong ka jylla Manipur u Y Khemchand Singh ha ka taïew ba la lah u la pdiang sngewbha ïa ka rai jong ka sorkar pdeng ban thaw ïa ka komiti ba hakhliehduh ban pule bniah ïa ki jingkylla ha ka jingbun briew ha ki jylla khappud, da kaba batai ïa kane kum ka “jingleh ba pawnam” bad pynthikna ïa ka jingïatreilang kaba pura na ka sorkar jylla.
Ha ka jingpynbna, u Myntri Rangbah ka jylla u la ong ba ka sorkar Manipur kan ai ïa ka jingkyrshan kaba donkam baroh sha ka kynhun, kaba la thaw ban bishar ïa ki jingkylla ha ka jingbun briew ha ka ri kiba ïadei bad ki mat kum ka jingwan buhai shnong beaiñ bad kiwei kiwei ki jingeh kiba ïadei bad kane.
“Ka sorkar Manipur kan pynïar ïa ka jingïatreilang kaba pura sha ka komiti ba ha khlieh duh”, la ong u Singh.
U Myntri Rangbah u la ïaroh ïa ka jingthmu jong ka sorkar pdeng bad u la kdew ïa ka jingpynbna kham mynshwa jong u Myntri Rangbahduh ka ri u Narendra Modi shaphang ka Mission kaba donbor bha kaba la leh ha ka 15 tarik u Nailar, 2025.
“Ka jingpynbna jong u Myntri Rangbahduh ka ri ïa ka mission ba donbor bha ha ka 15 tarik u Nailar, 2025, bud sa ka jingmynjur jong ka kynhun Myntri jong ka sorkar pdeng ha ka 11 tarik u Nailur, ka pyni ïa ka jingïarap kaba don histori bad kaba la ap slem bha na ka bynta ki paidbah ka Manipur bad kiwei kiwei ki jylla khappud,” ong u Singh.
