Shillong, Jylliew 01
Ka Zee Entertainment ka la pynbna ha ka lah sngi U Blei ba ka la ïoh ïa ka hok ban pyni ïa ki jingïalehkai jong ka FIFA World Cup 2026 bad 38 tylli kiwei pat ki jingïalehkai haduh u snem 2034, kaba kane la pynkut noh ïa ka jingartatien jong ki paidbah ka ri India ba kin duh ha ka ban sakhi ïa kane ka lympung kaba heh ha ka pyrthei.
Ïa ki kyndon ha kaba ïadei bad ka jingsiew pisa ym shym la pynpaw eiei. Kat kum ki khubor la ong ba ha kaba sdang ka FIFA ka la pan kumba $100 million na ka bynta ka package jong ka India kaba kynthup ïa ka World Cup 2026 bad 2030 shwa ban pynduna ïa ka dor pan jong ka sha ka $60 million.
Kane ka jingïateh kular ka wan 10 sngi hashwa ban sdang kane ka lympung ïalehkai ha ka 11 tarik mynta u bnai ha kylleng ka ri America, Canada bad Mexico.
Ka tnat pathai khubor na ka bynta ki jingïalehkai jong ka India, ka JioStar, ka tnad treikam ba ïatreilang jong ka Reliance bad ka Disney, kaba la ïoh ban pyni ïa ka World Cup 2022, lyngba ka Viacom18, kaba la don hashwa jong ka, ka la tyrwa kumba $20 million na ka bynta ki hok, hynrei la kyntait ïa ka da ka FIFA.
Kumjuh ka Sony, kaba la ïoh ïa ka hok ban pyni ïa kane ka lympung ïalehkai ha u snem 2014 bad 2018, ka la pynlong ka jingïamir jingmut lang, hynrei kam shym la phah ka jingtyrwa sha ka FIFA.
Da kaba ym shym la don mano mano ba lah ban pynthikna ïa ka hok ban pyni paidbah la bun bnai, ka Delhi High Court ha ka 12 tarik u Jymmang, ka la pan jubab ïa ka Sorkar Pdeng bad ka Prasar Bharati ban jubab ïa ka dorkhas kaba pan jingpynbna paidbah ïa ka FIFA World Cup 2026.
Ka dorkhas jong u Avdhesh Bairwa, u nongïasaid aiñ, ka la pan ïa ka jingbthah na ka sorkar pdeng ban ïoh ïa ka hok ban pyni na ka bynta ka jingsdang jong ka jingïalehkai, ka quarter-final, ka semi-final, bad ka final kaba kyrshan ïa ka Prasar Bharati kum ka lad ba shipor. Kum ka jingpynlait kaba khatduh, utei u nongujor u la pan ba dei ban ïoh ïa ka hok na ka bynta baroh 104 tylli ki jingïalehkai.
Te kumta ka FIFA ka la pynkut ïa ki jingïateh bad ki nongpynbna ha palat 180 tylli ki ri ha ka pyrthei, ka la ong mynshwa. Ka India ka la don 2.9% ki nongpeit lyngba ki TV ha ka World Cup kaba la long ha 2022.
