Itanagar, Jylliew:
U Myntri Rangbah ka Arunachal Pradesh, u Pema Khandu, ha ka sngi Balang, u la pynbna ba ka sorkar Arunachal Pradesh kan thaw ïa ka tnad ba kyrpang na ka bynta ka jingpyntreikam halor ka Inner Line Permit (ILP) khnang ban lah ban pynkhlaiñ ïa ka jingpyntreikam jong ka bad ban ïada ïa ki hok jong ki trai ri trai muluk.
Kane ka jingpynbna ka la mih hadien ka jingïalang ai jingmut ba hakhliehduh kaba la neh hynñiew kynta ha kaba la ïashim bynta da ki kynhun seng jong ki samla pule, ki Community-Based Organisation (CBOs), ki seng saiñpyrthei, ki riew shemphang ha ka liang ka aiñ bad ki sengbhalang ban ïakren halor ki mat kiba ïadei bad ka hok jong ki trai ri trai muluk bad ka jingpyntreikam ïa ka ILP.
Haba batai ïa ki jingïamir jingmut kum kawei na ki jingïakren ba jylliew bha halor ka lawei jong ka jylla bad ki jaitbynriew trai ri trai muluk jong ka, u Khandu u la ong ba ka sorkar ka dang ïai bteng ban ïada ïa ka jinglong kyrpang, ka jingshngaiñ ha ka jingbun briew bad ki hok Riti synshar jong ki riewlum jong ka Arunachal Pradesh.
“Baroh ki sengbhalang, ki seng samla pule, ki nongmihkhmat jong ki seng saiñpyrthei bad kiwei kiwei ki nongshim bynta ki la wan sha kane ka jingïalang ai jingmut bad ki la ïasam ïa ki jingeh bad ki jingai jingmut jong ki,” ong u Myntri Rangbah ka jylla ha ki nongthoh khubor hadien ka jingïalang.
Ha kane ka jingïalang la ïakren ruh halor ki jingdawa ba la wanrah da ka Arunachal Pradesh ST Bachao Andolan Committee (APSTBAC), ba kynthup ïa ka jingïada kaba khlaiñ ïa ki hok jong ki trai ri trai muluk, ban leh pyrshah ïa ki nongwan buhai shnong be-aiñ, ban pyntreikam tyngeh ïa ka rukom treikam ka ILP bad ka jingpyrshah ban ai ïa ka kyrdan Scheduled Tribe sha ki jaitbynriew bym dei ki riewlum.
U Khandu u la ong ba ka sorkar ka la pdiang ïa baroh saw tylli ki jingdawa “ha ka nongrim”, da kaba batai ïa ki kum ki jingsngewkhia ba shisha.
Halor ka mat jong ki jingtei niam ba la kynnoh beaiñ, u Myntri Rangbah u la ong ba ka sorkar kan shim khia, ïa ki mosque beaiñ ha ka jylla bad bynrap ba la dep ban ai jingbthah sha u Chief Secretary na ka bynta ban pynkhreh ïa ka kaiphod kaba bniah halor kum kine ki jingtei na ka bynta ban leh ïa kaba donkam.
Kine baroh ki la long ha ka por ba dang jur bha ki jingïakhih halor ka “Arunachal Pradesh Inner Line Permit Guidelines, 2026”.
Ka APSTBAC kham hashwa ka la khot ïa ka pakhang shnong kaba 36 kynta naduh ka 14 tarik, Jymmang, da kaba kynnoh ba ki kyndon thymmai jong ka ILP ki lah ban pynduna ïa ki jingïada ïa ki trai ri trai muluk bad ban pyntlot ïa ki kyndon jong ka Bengal Eastern Frontier Regulation, 1873.
Ka jingïakhih ka la kylla long kaba shyrkhei ha ka 15 tarik u Jymmang, ha kaba la ïathuh ba ki don ki jingïaleh pyrshah hapdeng ki nongïakhih bad ki bor pahara.
Ka komiti ka la maham ruh ban pynlong ïa ka jingkhang dam kaba 72 kynta ha baroh kawei ka jylla lada ka sorkar kam lah ban pynbeit ïa ki jingdawa jong ka.
Haba jubab ïa ki jingkylli ha kaba ïadei bad ka jingthmu ban pynlong ïa ka pakhang ha ka nongbah kaba 24 kynta kaba la khot da ka seng riewlum jong ka Arunachal Pradesh Indigenous Youth Organisation (APIYO) halor ka jingkynnoh ba ki don ki mosque beaiñ ha Itanagar, u Khandu u la ong ba ka seng ka la pynbna ïa ka jingïakhih khlem da ap ïa ka jingmih na ka jingïalang ïamir jingmut.
“Ki jingdawa jong ki ki long kiba shisha, bad ka sorkar ka la dep pynbna ban leh ei ei ha ka por ba ïakynduh”, u la ong, haba kyrpad ïa ka jingsuk, ka jingpyrkhing bad ka jingïatreilang na baroh ki seng bad ki nongshong shnong.
