Shillong, Jylliew 02
Ka Them Rangshken SC bad ka Ïaitylli S&CC ki la khur jingjop ha ka lympung ïalehkai U-20 4th Division Football League 2026 ba la pynïaid da ka Shillong Sports Association (SSA) ha ka sngi Ba-ar.
Ha kane ka jingïakhun kaba la long ha SSA Stadium Polo, ka Them Rangshken ka la pynliem noh ïa ka Riatsamthiah SC da 5-1 kol. U Mebadonbok Malngiang u la thep marwei haduh saw kol ha ka minit kaba 14, 47, 51 & 70 bad ïa kawei pat la thep da u Batistar Langstieh (80+3), Katba na ka Riatsamthiah la thep shi kol da u Nangpynskhem Kharmuti (23).
Ha ka jingïakhun kaba la long ha madan MFA, ka Ïaitylli S&CC ka la jop da 4-2 ïa ka Pommura SC. U Kitbok Muksor u la thep ar kol ha ka minit kaba 14 & 50, katba ïa kiwei pat la thep da u Banbisharlang Mawlong (26) bad u Jesnellborn Kharbani (30). Na ka liang ka Pommura ka la pynphai kylla ar kol lyngba u Emerald Mawthoh (35 & 80+2).
Haba phai sha kawei pat ka jingïakhun kaba la long kham hashwa ha SSA Stadium hapdeng ka Phir Kurbah MSS&CC bad ka Lumkseh SC ki la ïasam mar shi poiñ hadien ba ki la ïakhaid mar 1-1 kol.
Tang mar ïasdang ka jingïalehkai ka Phir Kurbah ka la pynkhih jar nyngkong eh lyngba u Wankistar Malngiang ha ka minit kaba 2, hynrei ka Lumkseh ka la lah ban pynphai kylla lyngba u Banteinam Khonglam (28) na ka bynta ban ïakhaid mar shi kol.
Kane ka lympung kan bteng biang ha ka sngi Balang, ha kaba ka jingïakhun kan long hapdeng ka Thynroit SC pyrshah ïa ka Don Bosco Academy ha ka por 1 baje mynsngi bad ka Laitlulong SC ïa ka Mawpdang SC ha ka por 4 baje nohphai sngi. Kine ki jingïalehkai kin long ha SSA Stadium. Katba ha madan MFA kaba ha Third Ground ka Weilyngkut Area FCC ïa ka Nongthymmai S&CC ha ka por 4 baje nohphai sngi.
