Shillong, Jylliew 02
U rangïalehkai shakhmat ka Switzerland, u Breel Embolo, um shym la ïoh ban leit lang bad ka kynhun sha America na ka bynta ka World Cup, hadien ba la shah khmih bniah ïa ki kot ki sla leit jingleit jong u.
Kine ki kot ki sla ba la tip kum ka Electronic System for Travel Authorisation (ESTA), ka dei ka rukom treikam kaba pynbeit hi ïa ka jinglong ba shisha jong ki nongleit jingleit sha US hapoh ka Visa Waiver Program.
Katei ka kynhun ïalehkai jong ka Switzerland ka la leit da ka liengsuiñ na Zurich sha Los Angeles ha ka sngi Ba-ar shwa ban leit sha ka jaka kilanmet jong ka World Cup ha San Diego. Kane ka kynun kan pynkhreh ïa ka jingïalehkai ba nyngkong jong ka ha ka Group-B pyrshah ïa ka Qatar ha San Francisco ha ka 14 tarik mynta u bnai.
“Ngim shym la poi pyrkhat ba u Breel Embolo um shym la lah ban leit lang bad ka kynhun sha United States,” la pynpaw katkum ka kyrwoh jong ka synjuk ïalehkai Switzerland halor utei u rangïalehkai shakhmat, uba la ïoh ban thep 24 kol ha ki 86 tylli ki jingïalehkai bar ri.
“Ïa ka ESTA jong u la mynjur haduh ka por mynstep. Haduh ka por 10:30 mynstep ki la ïoh jingtip ba ka aplikeshon ESTA ka jong u ka dangdon hapdeng ka jingshah bishar bniah.”
“Ïa mynta ngi dangpyrshang ban ïakren bad ki bor ba dei khmih bad ngi la khmih lynti ba u Breel un sa lah ban ïasoh lang bad ka kynhun ha ka sngi kaba bud lane hadien.”
Ka jingeh jong u Embolo ka wan hadien ba ka rai ka ïingbishar jong ka Switzerland ha kaba ïadei bad ki kynrum kynram ha u snem 2018 ha Basel ka la long kaba kut jong ki khyndai bnai mynshwa.
Utei u rangïalehkai shakhmat ka Stade Rennais u la shah rai pynrem ha u snem 2023 namar ba u la byrngem bunsien bad u la shah pynngat ha ka kuna bad shah sospon, ka rai kaba la pynskhem ha ka jingujor hadien ba ki nongbishar ki la kyntait ïa ka jingïathuh jong u shaphang katei ka jingjia.
